VOV4.Xơ Đăng - Hâi lơ 14/6, Khu ngăn mơhno túa lĕm tro – Tơ’noăng ivá ƀă Ôm hyô kong pơlê Dak Lak tơkŭm po tơdroăng ki pơxiâm po 2 lâm hnê tŏn chêng koăng ăm mâu vâi hdrêng phô̆m vâ xông kân a tơring Krông Ana. Tung mê, lâm hnê tŏn chêng koăng Jhô dêi mơngế Rơđế Bih a pơlê kân Ƀuôn Trấp ăm mâu vâi muăn kơdrâi ƀă 20 ngế hriâm tung hơnăm sap ing 6 troh 12 hơnăm.

Pơxiâm po lâm hnê tŏn chêng koăng Jhô a tơring Krông Ana, kong pơlê Dak Lak

Lâm hnê tŏn chêng koăng a cheăm Drai Sáp ai 21 ngế hriâm cho khu kơnốu, kơdrâi tung hơnăm pơla ing 20 – 40 hơnăm veăng hriâm. Tung pơla 2 khế, mâu ngế ki hriâm kô châ hriâm túa ki tŏn mâu ƀai chêng môi tiah Tơdah tơmối, hơniâp ro châ xo hên kế tơmeăm, xối pleăng báu nếo. Mâu rôh hriâm châ tơkŭm po a kong măng a hngêi mơhno túa lĕm tro cheăm lơ a hngêi mơhno túa lĕm tro dêi pơlê, xua mâu ngê̆ nhân ki tŏn chêng koăng a cheăm hnê. Rôh kố, Dak Lak xuân tơkŭm po môi to lâm hnê tŏn chêng M’nông a tơring Lak ăm 20 ngế hriâm sap ing 15 – 25 hơnăm veăng hriâm.

Katarina Nga tơplôu ƀă tơbleăng