Sap lơ  10/2, tơdroăng to rui a Tíu xiâm ăm tơmối ôm hyô Kông vé Buôn Đôn kô pơtê tâi tâng. Tơdrêng amê, tung rôh po leh tơbleăng kơphế Ƀuôn Ma Thuột roh má 8 la ngiâ kố ah, mâu tơdroăng ki hmâ hlo ăm rui klê têa, tơ’noăng kơtâu, tơ’noăng kơtú ƀa long ôh pá tơkŭm po xếo. Tiô tối tơbleăng dêi Khu ngăn ôm hyô ƀă hngêi ăm tơmối kâ koi ối pơtê Biệt Điện (a pơlê kong kơdrâm Ƀuôn Ma Thuột, Dak Lak), sap hâi lơ 10/2, tíu pêi cheăng kố hiăng pơtê tơdroăng ăm to rui, ăm rui tơ’noăng a tíu ôm hyô Kông vế Buôn Đôn, cheăm Krông Na, tơring Buôn Đôn, hơ’lêh amê ƀă môi tơdroăng ôm hyô ki nếo mơhno túa lĕm tro dêi kong pơlê ƀă tơdroăng pêi pro tung ôm hyô hmâ ƀă rui mê cho ăm rui xah prôk hêi, xah ƀă tơmối.

Pơkâ mê vâ pêi pro troăng rơhlâ dêi kong pơlê Dak Lak ‘na tơdroăng pơtê ôm hyô to rui tung tơdroăng cheăng tê mơdró ôm hyô vâ pơtối rak vế khu rui hngêi dêi kong pơlê, pơ’lêh chiâng tíu ôm hyô hmâ. Xuan tơdjâk troh tơdroăng po leh ‘na rui dêi Ƀuôn Đôn - môi tung mâu tơdroăng cheăng ki xiâm dêi hâi Leh kơphế Ƀuôn Ma Thuột rôh má 8, hơnăm 2023 po a khế 3 la ngiâ a Dak Lak, kô ôh tá ai xếo mâu tơdroăng pêi pro, môi tiah: ăm rui tơ’noăng kơtâu, ăm rui tơ’noăng klê têa, ăm rui tơ’noăng kơtú ƀa long, ôh tá ăm rui hrot kơxái ƀă mơngế.

Teăng amê kố ai mâu tơdroăng xah hêi: Xối ivá ăm rui, ăm rui prôk buffet, tơ’noăng rơnuâ ăm rui, tơ’noăng ăm rui koh kơ mơngế, ăm rui ngăn ƀă xup um ƀă tơmối.