Tiô tơdrá idrâp chêng, pâ H’Loan, ối a ƀuôn Akŏ Dhông pơlê kong kơdrâm Ƀuôn Ma Thuột, ngế pơkuâ tơbâ po mơdĭng kâ báu nếo krếo xeăng ƀă tơmối troh vâ hlo tơdroăng pro pơro hâk ro châ xo hên tơmeăm pêi lo ing chiâk tung hơnăm kố nah. Kơnôm mêi ‘ló tô tro, tơmeăm pêt mơjiâng xông ngiât lĕm, kơtóu plâi hên mê chiâng châ xo hên. Báu pêng kơxâk, kơphế pêng hnôu. Kố báu alâi kơphế hiăng châ xo, ngế pơkuâ xiâm pro mơdĭng mơnê kơ xeăng tơnêi, xeăng kong hlối xah hêi ro ƀă rêm ngế.

Pâ H’Loan ăm ‘nâi, Tĭng kâ báu nếo hiăng ai sap ing nah tung tơdroăng pêi cheăng kâ pêi chiâk dêi mơngế Rơđế. Nôkố, mơngế Rơđế hiăng pơ’lêh pêt hên hdrê loăng, môi tiah: kơphế, tiu. Mơhé ti mê, tơdroăng po Tĭng kâ báu nếo xuân ối pơtối rak vế ki kơnía git.

Tung pơla mê, tơmối ối châ ngăn châ hmâng mâu tơdroăng rơngê rơngôi hơ‘muăn hdrôu Dam Săn ƀă tăng ‘nâi plĕng túa lĕm tro kơphế dêi hên kong têa tung lâp plâi tơnêi. Kố xuân cho môi tơdroăng po mơdĭng kơphế Ƀuôn Ma Thuột hơnăm 2023 tiô tối hdrối kô po a khế 3 hơnăm la ngiâ a Dak Lak.