Rôh Têt Lo hơnăm nếo kố, kong pơlê Dak Lak hiăng tơdah 130 rơpâu ngế tơmối ôm hyô tung tơnêi têa ƀă kong têa ê troh lăm ôm hyô, ối pơtê, xah hêi rơnó hngui. Tiô khu ngăn Mơhno túa lĕm tro, tơ’noăng ivá ƀă Ôm hyô Dak Lak, riân troh hâi lơ 26/1, tơkéa vâ tối cho hâi má 5 Têt Lo hơnăm nếo. Tâi tâng kơxô̆ liăn châ xo ing ôm hyô châ 14 rơtal liăn, tâk tơdế tâng pơchông ƀă khế kố hơnăm hdrối. ‘Na tơdroăng ki mung kơbong ối, châ lối 55%.

Tiô pôa Lại Đức Đại, Kăn phŏ ngăn Mơhno túa lĕm tro tơ’noăng Ivá ƀă Ôm hyô kong pơlê Dak Lak, sap ing hdrối Têt mâu cheăm tơring tung kong pơlê hiăng mơdêk séa ngăn, ‘mâi rơnêu mâu tíu ôm hyô ƀă mâu kế tơmeăm ôm hyô dế ai nôkố vâ kum ăm tơmối ôm hyô tơniăn lĕm má môi. Mâu tíu tê mơdró ôu kâ ƀă ối pơtê pơrá tơbleăng kơƀeăng yă ƀă tê tro yă hiăng pơkâ, ôh tá ai tơdroăng ki hjip yă kơ tơmối. Malối, tung rôh Têt Lo hơnăm nếo kố, xua kong prâi tơniăn lĕm, mâu tơdroăng cheăng mơhno túa lĕm tro, mơdĭng a mâu cheăm, tơring hiăng veăng kum tơ’mot tơmối troh a Dak Lak.