Lối 10 khế dêi hơnăm 2022, tơmối ôm hyô troh a kong pơlê Dak Lak vâ chê 1 rơtuh hdroh tơmối, kơxô̆ liăn châ xo ing tơdroăng ôm hyô hiăng luâ pơkâ dêi hơnăm, tung mê dâng 12% cho tơmối lâp plâi tơnêi. Tâi tâng kơxô̆ liăn châ xo ing ôm hyô riân châ 842 rơtal liăn, luâ lối 50 rơtal liăn tâng vâ pơchông ƀă pơkâ dêi hơnăm 2022. Ôm hyô Dak Lak hiăng rĕng ‘mâi mơnhông klêi ai pơreăng COVID-19 châ mơdât.

Troăng rơhlâ tơdjuôm dêi tơmối rah xo mâu tíu ôm hyô nếo, ai hên tíu vâ ngăn, tíu ki tơviah, thế rah mâu tíu troh a Dak Lak. Jâ Nguyến Thụy Phương Hiếu - kăn phŏ ngăn ‘na Túa lĕm tro Ivá ƀă Ôm hyô kong pơlê Dak Lak ăm ‘nâi, kong pơlê dế pơtối ai troăng rơhlâ kơjo kum mâu khu tơrŭm cheăng, mâu ngế mơdêk ôm hyô, tung mê ki tơxâng tơmâng mơdêk ôm hyô ngăn nhâ loăng kuăn kiâ kong ƀă pơtối rak tơmeăm khoăng ki lĕm tro ton nah dêi hdroâng kuăn ngo.

Tung pơla sap hơnăm 2021-2025, kong pơlê hiăng rah xo ‘no liăn mơjiâng pro ăm 5 to pơlê dêi hdroâng kuăn ngo, ƀă kơlo kơjo tŏng kum sap 800 rơtuh - 1 rơtal liăn vâ mơnhông mơdêk Ôm hyô.