Kŏng ti veăng tơlo liăn ôm hyô ngăn nhâ loăng kuăn kiâ, túa lĕm tro, kuăn pơlê Akŏ Tam a pơlê kong kơdrâm Ƀuôn Ma Thuột tơkŭm po leh chôu nhang, pleăng tơmeăm vâ mơnê kơ Quốc Mẫu tơ'mot krâm kuăn pơlê ƀă tơmối lăm ngăn.

Mâu hâi apoăng rơnó Hơngui, a mâu tơring dêi kong pơlê Dak Lak xuân pêi pro hên tơdroăng mơhno túa lĕm tro - tơ’noăng ivá mê cho: Hâi mơdĭng tơ’noăng ivá kuăn ngo Mông a tơring Krông Bông, Mơdĭng Hảng Pồ a pơlê kong krâm Ƀuôn Hồ, Mơdĭng mơhno túa lĕm tro  ton nah Việt Bắc a tơring Krông Năng; tơ’noăng giải Vật Vụ Bổn, a tơring Krông Ana po tơ’noăng vo plong mâu kơnốu tiô hmâ ton nah po rơdâ ƀă mơdĭng tah loăng kâng dêi mơngế Mường.

Kố ôh tá xê to mâu tơdroăng pêi pro veăng ‘no hnoăng mơhnhôk ôm hyô, mê ối pro tíu ki xah hêi lĕm ro ăm kuăn pơlê ƀă tơmối ki troh ngăn.