Hâi lơ 22/11, a kong pơlê Dak Nông hiăng po rôh hôp lâp plâi tơnêi ‘na Kiâp hmốu ngo on rôh má 20 (ISV20) ƀă Rôh hôp Khoa hok “15 hơnăm mơnhông Công viên tơnêi tơníu a Việt Nam” tiô tơdroăng ki ‘no tơdrêng ing troăng um tơvi ƀă hyôh internet. Po troh hâi lơ 26/11, ƀă inâi: “Rak vế ƀă mơnhông krá tơniăn ton mâu ngo on ƀă kiêp hmốu ngo on”, kố cho rôh apoăng môi Rôh hôp lâp plâi tơnêi ‘na kiêp hmốu ngo on châ tơkŭm po a Việt Nam.

Rôh hôp ai mâu rôh tơpui tơno ‘na tơdroăng: Tơnêi tơníu roh ton nah, tung pơla mơjiâng ngo on; xúa kiâp hmốu, Sinh học tung kiâp, Rak ngăn ƀă rak vế kiâp hmốu; Tối tơbleăng séa ngăn kiâp hmốu ƀă mâu kế tơmeăm. Jâ Tôn Thị Ngọc Hạnh, Kăn phŏ hnê ngăn Vi ƀan kong pơlê Dak Nông, ăm ‘nâi, tơdroăng ki tơkŭm po Rôh hôp ISV20 cho môi tơdroăng ki tơpui tơno ki kal, kum kong pơlê tơbleăng, mơđah châ tơƀrê ‘na kiâp hmốu on – kế tơmeăm tơnêi tơníu ki ivá tơxâng ƀă kong têa ê.