VOV4.Xơ Đăng - Kơxo lơ 9/6, a Hà Nội tơkŭm po leh mơgêi, diâp pri roh chêh ‘’mâu ngế djâ troăng ahdrối rêh ối lĕm kơnâ ‘nâng’’ roh má 13 (hơnăm 2021 – 2022) xua Hlá tơbeăng Khu lêng kuăn pơlê; Khu hlá tơbeăng – In pro hlá tơbeăng (ối tung Khu pơtâng hnê tối tơdroăng kal tơnêi têa) tơrŭm tơkŭm po. Khu tơkŭm po hiăng rah 19 ƀai ki má môi vâ  diâp pri.

Diâp pri roh tơ’noăng chêh ‘’mâu ngế djâ troăng ahdrối rêh ối lĕm kơnâ ‘nâng’’

Roh tơ’noăng châ mơhnhôk sap ing khế 6 hơnăm 2021 troh tâi khế 4 hơnăm 2022. Khu tơkŭm po hiăng tơdah châ lối 200 ƀai chêh veăng tơ’noăng a mâu tơdroăng ƀai chêh. Hlá tơbeăng Khu lêng kuăn pơlê hiăng rah xo tơbleăng tung mâu hlá tơbeăng dêi 145 ƀai chêh ki má môi, tung mê Khu tơkŭm po hiăng rah xo châ 19 ƀai chêh ki má môi vâ diâp pri, mê ai: 2 pri má môi, 3 pri má péa, 4 pri má pái, 10 pri mơhnhôk.

Pôa Trịnh Văn Quyết, Kăn phŏ pơkuâ Kơ koan xiâm kal kí khu lêng kuăn pơlê Việt Nam, Kăn pơkuâ hnê mơhno roh tơ’noăng tối ăm ‘nâi, mâu ƀai chêh xuân hiăng chêh tŭm tâi tâng, tối túa ki rơkê tơtro, ƀai hriâm ki kơnâ tung pêi pro, hriâm tâp, pêi tiô tơdjâ hiâm mơno Pôa Hồ Chí Minh.

A Sa Ly tơplôu ƀă tơbleăng