VOV4.Xơ Đăng - Pơla hdrối kố nah, a Hà Nội, Khu  xiâm Đoân Droh rơtăm Kŏng sản Hồ Chí Minh tơrŭm ƀă Khu ngăn tơdroăng cheăng kal kí tíu xiâm,  Vi ƀan  mơhno túa lĕm tro, Hnê hriâm  dêi Kuô̆k hô̆i, Khu xiâm ngăn mơhno túa lĕm tro tơ’noăng ivá ƀă ôm hyô, Rơ’jiu - Um tơvi Việt Nam ƀă khu tơrŭm cheăng mâu khu ngăn văn hok ngê̆ thuât Việt Nam tơkŭm po hneăng Hôp “Tơdroăng tung măng   ƀă xúa ‘na kring vế mơhno túa lĕm tro ‘na tuăn mơno dêi mâu hơnăm ối nếo”.

Tơbleăng a hneăng hôp, pôa Nguyễn Trọng Nghiã, Ngế pơkuâ hnê cheăng kal kí xiâm tơnêi têa pơkâ thế mâu khu râ Đoân xúa ki pơxúa dêi măng, tung pơ’lêh kơxô̆ vâ mơdêk hlê plĕng dêi mâu rơxông nếo ‘na tơdroăng roh ton nah, mâu tơdroăng ki pơxúa mơhno túa lĕm tro tơviah dêi mâu hdroâng kuăn ngo.

A hneăng hôp tơpui tơno, mâu kăn teăng mâ tơkŭm hlê plĕng ‘na tơdroăng tơdjâk dêi hyôh măng Internet, mâu tơdroăng pêi cheăng tơkâ kơpong tơkăng kong ƀă hnoăng cheăng gak kring tơkăng kong khôi túa lĕm tro troăng tơmiât tung hneăng nôkố. Tối troh mâu tơmeăm mơhno túa lĕm tro tung măng, mâu rơkong tơpui tối, kal ai troăng mơdât ƀă mâu tơmeăm kố tung măng, vâ thăm rak tơniăn tơbleăng tơdroăng ăm tơtro, khât păng ‘nâng, bâ eăng lĕm, tơtro lĕm, hnê troăng prôk la ngiâ mơhno khôi túa lĕm tro ăm kuăn pơlê, ki má lối cho rơxông hơnăm ối nếo; mơjiâng tíu cheăng tơdâng, tơtro vâ mâu tơdroăng xiâm kối, mâu tơmeăm mơhno túa lĕm tro tung troăng măng tung mơnhông mơdêk.

Vâ rơxông ối nếo tơdjuôm ivá gak kring xiâm kối khôi túa lĕm tro troăng tơmiât tung hyôh măng, Phŏ yăo sư, tiê̆n sih Nguyễn Thị Thu Phương, Kăn pơkuâ Viê̆n Văn hóa Ngê̆ thuât tơnêi têa Việt nam (ối tung Khu xiâm ‘na mơhno khôi túa lĕm tro – tơdroăng kal ƀă ôm hyô) tối, kal mơjiâng tíu ai tŭm tơmeăm ăm rơxông ối nếo tơmiât pêi rơkê.

‘’Tơmeăm ai tŭm pro vâi lo tơngah, vâ châ hlê plĕng, kal ai mâu hneăng tơpui tơno lơ mâu tơdroăng chuyên đề, lơ tơkŭm po hên mâu leh mơdĭng ƀă hía hé. Mâu tơdroăng mê cho troăng vâ mơjiâng tíu vâ mâu rơxông ối nếo kô chiâng tơdjêp ƀă tơdroăng roh ton nah. Ôh tá ai troăng ki lâi mơhno tơdroăng ki rơdêi dêi tơdroăng rêh ối, pêng păm tơdroăng ki troh lâp lu tâ drêng mơngế rơxông ối nếo pơ’lêh mâu tơdroăng ki lâi ki kơnâ ing mâu tơdroăng mơhno nếo, troăng tâ nếo dêi vâi’’.

Ngế xiâm hnê mơhno Tíu xiâm Đảng 

Xông tơpui a roh hôp tơpui tơno, pôa Nguyễn Trọng Nghĩa, Kăn pơkuâ ‘na tơdroăng loi tĭng, tiô khôp Tơnêi têa kheăn kơdeăn păng ‘nâng Đoân droh rơtăm ƀă rơxông ối nếo Việt Nam hiăng ƀă dế tơkŭm po hên tơdroăng pêi cheăng ki nhên vâ veăng kum rak ‘măn, rak vế, mơnhông khôi túa lĕm tro hdroâng kuăn ngo, gak kring tơkăng kong troăng tơmiât khôi túa lĕm tro tung pơla pêi cheăng xúa  kơmăi kơmok. Mê cho rơpâu roh hôp kal kí, mâu tơdroăng châ hlo châ tâ ‘na xiâm ối, lăm ngăn tíu chôu ‘măn rak vế tơmeăm khoăng roh ton nah, tơdroăng pêi cheăng a tiú hơngế. Mâu roh tơ’noăng ti tăng plĕng 'na khôi túa lĕm tro, tơdroăng mơnhông mơdêk dêi hdroâng mơngế rế hía rế ai hên, ki rơhêng vâ tối cho tơdroăng xúa kŏng ngê̆ kơmăi kơmok châ pêi pro ó rơdêi.

Khu pơkuâ Đoân droh rơtăm, khu tơrŭm hiăng ai hên troăng tơmiât pêi rơkê, mơjiâng tíu pêi cheăng, tŏng kum kơxô̆ liăn, hnê mơhno troăng hơlâ, mơngế pêi cheăng kum droh rơtăm pơxiâm tăng cheăng pêi pơ’lêh nếo troăng tơmiât pêi tung hên tơdroăng cheăng, hên kơvâ cheăng, tung mê ai hên khu tê mơdró hơnăm ối nếo hiăng châ tơƀrê tung kơvâ cheăng kơmăi kơmok khôi túa lĕm tro, ƀă mâu tơmeăm mơhno túa lĕm tro ki má môi kơpong, ƀă khôi túa lĕm tro ôm hyô, ƀă kơmăi kơmok tiô rơxông nếo.

Laga, tung pơla pơ’lêh pêi cheăng xúa kơmăi kơmok roh má 4, ƀă tơdroăng mơnhông mơdêk ó rơdêi dêi khoa hok ƀă kŏng ngê̆, dêi tơdroăng pêi cheăng pơ’lêh xúa kơmăi kơmok. Pôa Nguyễn Trọng Nghĩa, Kăn xiâm pơkuâ tơdroăng loi tĭng tiô khôp tơnêi têa pơkâ thế mâu khu râ xiâm Đoân xúa tâi tâng hyôh măng, tơdroăng pơ’lêh pêi cheăng xúa kơmăi kơmok vâ mơdêk hlê plĕng dêi rơxông ối nếo tơdroăng mơnhông mơdêk vâi krâ pin nah, mâu tơdroăng ki kơnâ khôi túa lĕm tro ki phá tơ-ê, má môi dêi hdroâng mơngế xuân môi tiah ‘na tíu cheăng, hnoăng cheăng dêi khôi túa lĕm tro tung tơdroăng mơdêk tơnêi têa.

‘’Mâu râ cheăng pêi pro tâi tâng tơdroăng ki mơnhông mơdêk tơ’lêi hlâu dêi hyôh măng, tơdroăng pơ’lêh xúa kơmăi kơmok vâ mơdêk hlê plĕng dêi mâu rơxông ối nếo ‘na tơdroăng mơnhông mơdêk vâi krâ nah, mâu tơdroăng ki kơnâ khôi túa lĕm tro ki phá tơ-ê má môi dêi hdroâng mơngế xuân môi tiah tíu cheăng, hnoăng cheăng dêi khôi túa lĕm tro ƀă tơdroăng mơnhông mơdêk tơnêi têa.

Tung roh pơ’lêh pêi cheăng xúa kơmăi kơmok 4.0, khu râ cheăng Đoân droh rơtăm kal tơkŭm hriăn plĕng, mơnhên mâu troăng tŏng kum droh rơtăm pơxiâm tăng cheăng pêi, pơ’lêh nếo tơmiât pêi rơkê tung kơvâ mơhno túa lĕm tro; khu tơrŭm cheăng, mơ’no liăn cheăng, tŏng kum mâu roh tơ’noăng, tơdroăng tơkêa bro pơxiâm tăng cheăng pêi ‘na mơhno túa lĕm tro, mâu troăng tơmiât pêi, tơmeăm mơhno khôi túa lĕm tro ki kơnâ, ai ivá troh lâp lu kân tung droh rơtăm phô̆m xông kân’’.

Tâi tâng a hneăng hôp

A hneăng hôp tơpui tơno, mâu kăn teăng mâ xuân tơkŭm tơpui tơno mâu tơdroăng xiâm ‘na hlê plĕng ki kal, tơdjâk troh, tơdjâk dêi hyôh măng, mâu tơdroăng pêi cheăng tơkâ tơkăng kong ƀă hnoăng gak kring tơkăng kong tiô khôi túa troăng tơmiât tung hneăng nôkố; tơdroăng ƀă troăng pêi vâ mơnhông mơdêk ki kơnâ khôi túa lĕm tro dêi mâu hdroâng kuăn ngo kum thăm mơnhông mâu kơvâ kơmăi kơmok mơhno túa lĕm tro a Việt Nam mơnhông mơdêk, djâ troăng ahdrối ki kơnâ troh lâp plâi tơnêi ƀă hía hé.

Mâu kăn teăng mâ xuân pơkâ mâu troăng pơkuâ ƀă mâu tơmeăm mơhno khôi túa lĕm tro tung hyôh măng; ti tăng troăng pêi, pơkâ troăng pêi la ngiâ vâ kum Đoân Droh rơtăm Kŏng san Hồ Chí Minh, mâu râ, kơvâ cheăng ƀă rơxông ối nếo Việt Nam veăng păng ‘nâng, trâu hơngế tâ tung tơdroăng mơhno khôi túa lĕm tro troăng tơmiât.

VOV1 chêh

A Sa Ly tơplôu ƀă tơbleăng