VOV4.Xơ Đăng - Nôkố, hên rơxông ối nếo rơtế [ă kuăn pơlê a mâu pơlê Tây Nguyên hiăng ai hên troăng pêi kâ vâ rak vế, mơnhông khôi túa lĕm tro hdroâng kuăn ngo, vâ tơdah tơmối ôm hyô klêi kơ’nâi pơreăng COVID-19 vâ rak tơniăn cheăng kâ, tơniăn tơdroăng rêh ối.

*** Mơhé hơnăm ối nếo, laga ngoh Siu Thanh, 25 hơnăm, thôn Pleiky, pơlê kân Nhơn Hòa, tơring }ư\ Pưh xah rơkê mâu kế xah chêng koăng dêi hdroâng kuăn ngo. Ngoh Siu Thanh tối ăm ‘nâi, ngoh chiâng tŏn chêng tơgôu koăng sap ing ối kŭn, chiâng hên ƀai chêng koăng tiô khôi vâi krâ nah. Laga, khôi túa lĕm tro chêng koăng tung kong pơlê Gia Lai tối krê ƀă mâu kong pơlê Tây Nguyên tối tơdjuôm dế tơ’lêi lôi hía.

Xua mê, tung la ngiâ, Siu Thanh pói vâ ai tơdroăng tơmâng tŏng kum hên tâ mê nếo dêi mâu khu râ, vâ pơtâng tối, tơbleăng tơmeăm ki kơnâ khôi túa lĕm tro chêng koăng tung mâu rơ’jíu, um tơvi ƀă troăng hyôh măng Internet; vêh pro mâu leh hô̆i tiô khôi hmâ vâi krâ nah ƀă hlối mơđah khôi túa lĕm tro chêng koăng. Ngoh Siu Thanh tối:

‘’Sap ing hdrối nah troh nôkố á đi đo mơ-eăm tâi ivá tơná vâ rak vế ƀă tơbleăng khôi túa lĕm tro xua jâ pôa pin nah lôi ăm pin sap ing ton na nah, ai môi tơdroăng ki khéa cho nôkố kuăn pơlê dế chôa 'lâng hiât piu lôi tơdroăng ki mê. Laga nôkố á dế rơtế nhŏng o tung pơlê mơ-eăm mơđah tơbleăng, tơbleăng mâu khôi túa ki lĕm tung khôi túa lĕm tro mâu hdroâng kuăn ngo ăm tâi tâng pú hmâ achê hơngế.

Ƀă nôkố mơ-eăm tâ mê nếo tung tơdroăng hnê ăm rơxông kơ’nâi, vâ kuăn ‘nĕng cháu chái pơtối rak ƀă mơnhông mơdêk khôi túa lĕm tro dêi vâi krâ pin’’.

*** Cho kăn ƀô̆ dêi Ƀơrô văn hoă - thŏng tin dêi tơring K[ang, kong pơlê Gia Lai, Đinh Mỡi ai tơdroăng cheăng rak ngăn mâu tíu tơbâ ton nah dêi tơring. Tơdroăng cheăng xiâm dêi ngoh cho hnê mơhno ƀă tơbleăng ăm tơmối troh ngăn ‘nâ ‘na tơdroăng pêi pro dêi Kăch măng dêi kuăn pơlê akố tung 2 rôh tơplâ xâ Pơhlăng ƀă xâ Mih ƀă mâu khôi túa vêa vong ki hmâ ton nah dêi mơngế Bơhnéa.

Mơhé ing apoăng hơnăm 2021 tơngi kô, tơdroăng ôm hyô akố tro tơdjâk xua pơreăng kân COVID-19, la ngoh xuân mơhnhôk kuăn pơlê mơ-eăm pơtâp, pơtối rak vế khu tŏn chêng, teăn hmôu jiâ. Nôkố, kơvâ ôm hyô hiăng hlo pơtối rak vế pêi pro, ngoh ƀă kuăn pơlê hâk ro chê pơkâ pơtối veăng ‘no ivá tơbleăng mâu khôi túa le\m tro ton nah dêi kơpong pơlê xiâm K[ang khên tơnôu troh tơmối.

Ngoh Đinh Mỡi, Kăn ƀô̆ ngăn mơhno tuá lê̆m tro tơring K[ang, kong pơlê Gia Lai ăm ‘nâi:

“Kơpong ôm hyô ton nah mơhno túa le\m tro râ kong pơlê ing mê cho kơpong dêi 10 to cheăm Kroong, tơring K[ang, kong pơlê Gia Lai hiăng ‘mâi mơnhông nếo. Kố cho tíu tơbâ ton nah ki kal, tung 2 hơnăm hdrối, pơreăng tâ tú ó, kơvâ ngăn ôm hyô trâm pá puât.

Nôkố drêng hiăng tâi pơreăng hiăng tơniăn, ôm hyô hlo hiăng mơnhông, a mơ-eám tơrŭm ƀă vâi krâ nhŏng o rơtế mơjiâng ƀă mơnhông tŏn chêng, mâu tơdroăng mơhno túa le\m tro, mâu tơdroăng pêi pro dêi kuăn pơlê rơngêi ting ting, ƀă ing mê kum pơtối rak vế mơdêk khôi túa le\m tro ton nah dêi kuăn ngo tơná tro tâ bă tơbleăng um meá ôm hyô ăm tơmối tung tơnêi têa ƀă kong têa ê.

Mâu ngế rơkê xuân môi tiah kuăn pơlê rơtế ƀă dêi rơpó pơtối rak vế, tơbleăng um meá ki le\m tro ton nah  hlối hnê tối ăm mâu kuăn cháu rơxông nếo ‘nâi tíu ki kal ƀă kăch măng ƀă kuăn pơlê a Gia Lai tối krê, lâp tơnêi têa tối tơchoâm’’.

*** Mâu hâi pêi pro klâ kơtăn pơlê pơla vâ hbrâ mơdât pơreăng COVID-19 cho drêng pơla jâ Thị Pyơm, ối a ƀon Bu Nrung, cheăm Đăk Bu So, tơring Tuy Đức, kong pơlê Dak Nông, rak ngăn mâu tơmeăm ếo pơtâk hdroâng kuăn ngo. Jâ tối ăm ‘nâi, lối 60 hơnăm pêi tơdroăng teăn ếo pơtâk hdroâng kuăn ngo, tá hâi la lâi jâ teăn rơneăm hên môi tiah tung pơla kố nah. Nôkố tơdroăng rêh ối hiăng vêh tơniăn tiah hmâ, jâ pơtối hnê tơdroăng teăn rơneăm ăm kuăn cháu vâ rak vế khôi túa lĕm tro ki má môi dêi hdroâng kuăn ngo.

‘’Mâu tơmeăm á teăn rơneăm hiăng châ tê tâi. Pakĭng mê á ối teăn rơneăm vâ xúa tung rơpŏng nếo. Á xuân teăn rơneăm hên tơmeăm vâi krâ pin nah vâ tơbâ ăm kuăn ‘nĕng, ƀă hnê ăm kuăn kơdrâi ‘nâi teăn rơneăm vâ rak vế tơdroăng cheăng vâi krâ nah. Nôkố mâu ngế chiâng teăn rơneăm cho iâ, tâng ôh tá hnê mê vâi kuăn ‘nĕng kô ôh tá chiâng ôh’’.

Gương - A Sa Ly tơplôu [ă tơbleăng