VOV4.Xơ Đăng - Hâi lơ 28/4, Khu râ kăn pêi cheăng dêi Hô̆i đong pơkuâ tơmeăm kơnía mơhno khôi túa lĕm tro tơnêi têa ai roh pêi cheăng ƀă Vi ƀan kong pơlê Gia Lai ‘na pơkâ thế dêi UNESCO ƀă mâu tơmeăm teăng mâ dêi kuăn mơngế, rak vế ƀă mơnhông mơdêk tíu chôu ‘măn tơmeăm kơnía tơnêi têa. Kong pơlê Gia Lai ai 33 tíu chôu ‘măn tơmeăm tơnêi têa, kơpong chôu ‘măn tơmeăm kơnía châ rah. Tung mê, ai tíu chôu ‘măn rak vế tơmeăm kơnía Tây Sơn Thượng Đạo, pơlê kong krâm An Khê châ mơnhên cho tơmeăm kơnía tơnêi têa ki má môi, rơtế 8 tíu chôu ‘măn tơmeăm kơnía tơnêi têa ƀă 16 tíu chôu ‘măn tơmeăm kơnía râ kong pơlê.

Tâi tâng roh pêi cheăng dêi Hô̆i đong tơmeăm mơhno khôi túa lĕm tro tơnêi têa ƀă Vi ƀan kong pơlê Gia Lai

Pakĭng mê, Tíu mơhno khôi túa lĕm tro chêng koăng, Hơ’muăn hdrôu, rơngêi rơngối hdroâng kuăn ngo Bơhnéa, rơkâu xối pâ kong mêi dêi Yang Pơtao Apui, châ chêh tung inâi tơmeăm kơnía mơhno túa lĕm tro tơnêi têa. Ƀă mâu tíu chôu ‘măn rak vế tơmeăm kơnía tơnêi têa a An Khê ƀă tơring Đăk Pơ, mâu hơnăm achê kố hiăng châ hlo hên tơmeăm ki kal, ton châ 80 rơpâu hơnăm, châ ngăn cho xiâm rêi dêi tơdroăng mơnhông mơdêk Việt Nam.

Laga, tơdroăng rak vế mâu tơmeăm mơhno khôi túa lĕm tro ki kơnâ kố xuân ối hên pá puât. A roh pêi cheăng, mâu khu tơrŭm cheăng tung Hô̆i đong pơkuâ tơmeăm kơnía mơhno khôi túa lĕm tro tơnêi têa pơkâ thế, pakĭng mê, kal pêi tơtro tơdroăng rak vế, kong pơlê Gia Lai kal ngăn mâu tơmeăm ki kơnía mơhno khôi túa lĕm tro cho tơmeăm ki kal vâ mơnhông mơdêk cheăng kâ, tơmiât la ngiâ mơjiâng Gia Lai chiâng tiú troh vâ lăm mâu tơmeăm kơnía a Tây Nguyên.

A Sa Ly tơplôu ƀă tơbleăng