VOV4.Xơ Đăng - Tung mâu hâi vâ chê Têt Lo hơnăm nếo, ngoh Siu Phi Lip, kot mâ hơnăm 1992, ối a pơlê Yon Tok, cheăm Ia Glai, tơring Čư Sê, kong pơlê Gia Lai dế  rơtế ƀă rơpŏng hngêi tơná hbrâ mâu kế kâ a hâi Têt. Drôu xiâm, hơ’nêh ro ki têng môi hâi, hơnêh í, chu, tơxông hiăng ai tŭm tâi tâng. La tiô ngoh, Têt ôh tá chiâng lôi môi túa kế vâ hơkĕm dêi mơngế Jarai, cho pêi po râm ƀă trôi chôu. Ngoh rơtế ƀă vâi nâ dêi tơná lăm troh a cheăm Ia Mơr, tơring Čư Prông, kơtăn tíu ngoh rêh ối dâng 20km vâ tăng trôi chôu.

Ngoh Siu Phi Lip tối:

“Trôi chôu hmâ tăng a rơnó mơdrăng, kâ kơhiâm. Xua rơnó mơdrăng gá ai kơtâ. Rơnó mơdrăng mê a lăm troh a cheăm Ia Mơr, tơring Čư Prông, rơnó kố hên má môi, djâ chhá ki lía, hơlong lơ hơkê, kơthung. Drêng hlo pâu trôi xo tâ tung ki lía. Ai hên drêng ‘nâ prôk 3 chôu kơxo troh 8chôu ah nếo pêng môi tơdrong chá ki liá, ‘nâ hiá tăng châ 2-3 kg , tâng trâm mơhúa.

Drêng vêh a hngêi, pin tâm tung têa krúa, klêi mê têng xĭng ing 1 -2 hâi. Klêi mê nếo pin pêi ƀă po, hăng vâ ’măn kâ a hâi Têt lơ ‘măn lôi 2-3 khế. A rôh leh Têt, á hmâ kâ hơkĕm trôi mê ƀă hơ’nêh ro, hơ’nêh chu, hơ’nêh kơnái kơhiâm ‘nâng’’.

Gương tơplôu ƀă tơbleăng