VOV4.Xơ Đăng - Ƀă inâi “ Hâi thơ Việt Nam rôh má 20 a Dak Lak hiăng châ tơkŭm po sap ing hâi lơ 15 troh 17/2, a troăng ‘Măn khu kơxop hlá mơ-éa kơphế Ƀuôn Ma Thuột. Tơdroăng kố xua Hô̆i Văn học Nghệ thuâ̆t kong pơlê Dak Lak tơrŭm ƀă Khu ngăn Mơhno túa lĕm tro Tơ’noăng ivá Ôm hyô tơkŭm po hên tơdroăng ki hơniap ro, djâ tơvế mơngiơk mơhno túa lĕm tro dêi mâu hdroâng kuăn ngo akố.

Apoăng cho tŏn chêng ƀă krếo tơmối ôu drôu tơdah tơmối dêi mơngế Rơđế, Hâi thơ Việt Nam roh má 20 a Dak Lak tơ’mot hên ngế troh veăng ngăn. Tung chôu phut xôk ro a Đường Sách-kơphế Buôn Ma Thuột, mâu tơmối châ ngăn mâu tơdroăng mơđah ki ro, tơkŭm pơla mâu ƀai tŏn chêng, rêi prôa tiô tơdrá kuăn ngo, pơchuât thơ, ngăn thơ ƀă hên tơdroăng pêi pro ki ê môi tiah kơchuâ um mơngế, pong rơgi um loăng, pâ chư chêh ki lĕm, mơđah tơbleăng um, mâu um ngê̆ thuât…ƀă hên ki ê.

Ngê̆ sih Linh Nga Niê Kdăm, ối a pơlê kong kơdrâm Ƀuôn Ma Thuột, tối:

‘’Tung pơla dế ai pơreăng kân COVID pin tơkŭm po tiah kố tro păng ‘nâng, tơkŭm hên túa hên tơdroăng pêi pro, á hlo hên tơdroăng tơrŭm pêi tiah kố gá lĕm, tro tiô khôi túa, vêa vong. Tơngah mâu tơdroăng ki tiah kố kô ai tơ’nôm mâu ngế ki rơhêng vâ ‘na thơ, hâk vâ ‘na văn hok tâ, ƀă vâ tơdroăng pơchuât ngăn hlá mơ-éa dêi mơngế Việt Nam xuân rế tơ-ƀrê tâ nếo’’.

Tơdroăng pro pơhuât thơ tung hâi thơ Việt Nam a Dak Lak

Malối, tung hâi pơxiâm tơbleăng thơ Việt Nam a Dak Lak hiăng pơtối mơhno tơdroăng ‘na rơngê rơngối MDrong Dam, hơ’muăn tối ‘na môi ngế khên tơnôu tung tơdroăng hơ’muăn hdrôu dêi Rơđế. Kố cho rôh apoăng túa ki kố châ tơbleăng a plông hơdruê xuâng, mơhno tung tơdroăng tŏn chêng a pơlê kong kơdrâm Ƀuôn Ma Thuột. Ngê̆ sih Vũ Lân, ngế ki rơkê tí tăng hriăn plĕng ‘na mơhno túa lĕm tro hdroâng kuăn ngo Tây Nguyên tối, Tơdroăng djâ rơngê rơngối hlối hơ‘muăn hdrôu tung tơdroăng mê hiăng pro ai tíu ki tro tơviah, krê dêi Tây Nguyên tung hâi leh pơchuât thơ dêi tơnêi têa:

“A tơchĕng hên má môi cho tơbleăng ‘’Klei Khan’’, tơkéa vâ  tối cho hơ’muăn hdrôu dêi mơngế Rơđế, ki khât gá cho môi túa thơ dêi Tây Nguyên, vâi tí tăng hriăn plĕng pro ai tơdrá ki prông prŏng ai drêng têi drêng chôa, ai drêng tâk drêng chu, malối cho mâu tơdroăng pơchuât tiô túa tơpui pơto pơtih ki ai tơdrá. Ƀă tơdrá mê rơtế ƀă mâu tơdrá rơngêi dêi mâu hdroâng kuăn ngo Tây Nguyên. Mê cho môi tơdroăng ki tơ’mot hên ngế rơhêng vâ hmâng’’.

Tơdroăng nghê̆ thuât ƀă hên mâu bai ki ‘ló tro tiô tuá dêi Tây Nguyên

Ƀă tơdroăng pơxá “Thế rêh ƀă tơngah’’, tơdroăng hâi thơ ối ai mâu tơdroăng mơhnhôk tuăn pâ môi tiah ăm mâu um tơmeăm ki pro vâ tê tơbleăng tăng liăn kum mâu ngế châi tamo ki kơtiê, tơdroăng pơchuât thơ pơtroh ăm mâu ngế púi vâ ‘na tơdroăng hơdruê, hơ‘muăn hdrôu ƀă tơdroăng rêh ối lê̆m.

Jâ Niê Thanh Mai, Kăn hnê ngăn Hô̆i văn hok ngê̆ thuât kong pơlê Dak Lak ăm ‘nâi, tơdroăng kố kô po ton ta troh hâi lơ 17/2 púi vâ ai tơ’nôm mâu ngế hak vâ ‘na văn hok ngê̆ thuât tung kuăn pơlê.

‘’Ngin púi vâ tiah kố hâi leh thế cho ăm to mâu ngế ki hâk vâ ‘na thơ khât, xua ti mê tung tơdroăng hâi kố ki xiâm ƀă ki khât dêi tơdroăng mơđah cho mơđah tiô khôi túa, vêa vong Tây Nguyên. Ƀă tung tơdroăng kơmăng kố “Rêh ƀă tơngah’’, ngin kô ai mâu tôh ki rơkê ‘na tơdroăng Tây Nguyên ton nah, ngế chêh thơ ƀă tơdroăng púi vâ, thơ rơnó hơngui rơtế ƀă mâu tơdroăng púi vâ ki nếo vâ pơtroh ăm hên ngế kuăn pơlê ƀă vâi pú hmâ ing tơdroăng djâ tơdroăng ki hơniâp ro troh rêm ngế ki hâk vâ ‘na thơ’’.

H’Xíu H’Mok chêh

Gương tơplôu tơbleăng