VOV4.Xơ Đăng - A Hà Nội nếo po Tơdroăng trâm mâ ngê̆ thuât ‘’Sao độc lập’’ 2022 drêng tơbâ 77 hơnăm Kăch măng Khế 8 ƀă mơjiâng tơnêi têa lơ 2/9 hiăng pơtroh tơdroăng ki pơ-ô pơ-eăng Tơnêi têa, hdroâng mơngế rơtế ƀă mâu tơdroăng ki kơnía git, ôh tá kâi hía dêi môi hdroâng mơngế khên tơnôu: Tơdroăng kố châ klâ pro péa tơdroăng ki xiiâm, môi tơdroăng ai inâi ‘’Việt Nam – Hdroâng mơngế, pleăng dêi châ xua tơdroăng ki lĕm tro’’ ƀă má péa cho ‘’Việt Nam – Tơdroăng ki hâk vâ dêi hơniâp lĕm ƀă mơnhông’’.

Khu tơkŭm po hiăng tơbleăng mâu phóng sự ƀă inâi ‘’Tơnêi têa dêi mâu ngoh khên tơnôu’’ ƀă Mâu ngoh khên tơnôu dêi chal nếo’’ ƀă hên mâu um hlá mớ-ea ki kơnía po ăm mâu tơdroăng ki ton nah khên tơnôu, mâu phim ki tối ‘na ivá nếo, rôh ki nếo dêi tơnêi têa tung rôh ki hơniâp lĕm. Malối, tung tơdroăng dêi tơdroăng “Sao đọc lập’’ hơnăm kố, Khu tơkŭm po diâp 20 hnoăng tơmeăm cho hlá mớ-ea kơdĭng liăn ƀă mâu kât reăng ki lĕm troh mâu kăn pơkuâ kăch măng ton nah, mâu Jâ Nôu Việt Nam khên tơnôu, mâu ngoh khên tơnôu dêi khu lêng kring vế, mâu mố đô̆i tro rong, mâu mố đô̆i hơnăm hiăng krâ ing mâu rôh tơplâ. Rêm hnoăng tơmeăm ƀă liăn mâ kơnâ 10 rơtuh sap ing kơxô̆ liăn pơlê pơla.

*** Pôa Võ Trọng Nam, Kăn phŏ pơkuâ Khu pơkuâ ‘na mơhno túa lĕm tro – Tơ’noăng ivá Pơlê kong kân Hồ Chí Minh tối ăm ‘nâi,  hơnăm kố pơlê kong kân ai pơkâ tơkŭm po Leh ‘’Têt tơniăn krê’’ leh tơbâ 77 hơnăm hâi Kăch măng Khế 8 ƀă Hâi mơjiâng tơnêi têa Kŏng hoa xah hô̆i chuh ngiah Việt Nam, 77 hơnăm hâi Sài Gòn xông tơplâ xâ tơbriât pơkuâ ƀă hên tơdroăng pêi ki rơtế pêi.

Hên tơdroăng leh tơbâ 77 hơnăm Hâi mơjiâng tơnêi têa lơ 2/9 a pơlê kong kân Hồ Chí Minh

Krê tung hâi lơ 2/9, pơlê kong kân ai hên tơdroăng pêi môi tiah: xúa khinh khí cầu toi hlá cơ a kĭng têa kroăng Sài Gòn; tơdúa parasut, tơ’noăng ivá a pêng têa kroăng; rơtế mơđah tơbleăng ivá; hơdruê xuâng. Ki rơhêng vâ tối cho tơdroăng ngê̆ thuât a kơmăng a kơphô̆ prôk chêng Nguyễn Huệ xuân cho môi hơnăm pơlê kong kân tơkâ hluâ pơreăng kân, pơlê kong kong kân ôh tá pĕng mlŏi reăng môi tiah mâu hơnăm hdrối mê a rơnó ki ê. Tâi tâng cho vâ tơkŭm rak ngăn ăm tơdroăng rêh ối dêi kuăn pơlê châ hên tâ.

*** Koh tơbâ 77 hơnăm Hâi mơjiâng tơnêi têa lơ 2/9 ƀă tơmiât troh tơbâ 190 hơnăm mơjiâng kong pơlê An Giang, tơring Tri Tôn tơkŭm po Mơdĭng kơto khinh khí cầu Tri Tôn hơnăm 2022 ƀă tơdúa parasut kơmăi, ƀă ôh tá ai kơmăi, tơrŭm Mơdĭng ăm ro tơ’noăng Bảy Núi ƀă pơxá: ‘’Kơneăng tơdế rơnó mơdĭng’’. Kố cho Mơdĭng kơto khinh khí cầu rôh apoăng châ tơkŭm po a miền Tây Nam Bộ. Mơdĭng kố tơkŭm vâ chê 20 to khinh khí cầu tŭm túa. Tung mê, ai 14 to khinh khí cầu râ má I kơneăng a ‘ngêi sap ing 20 – 40m châ pơkâ môi tíu ƀă 3 to khinh khí cầu râ 7; 2 to  khinh khí cầu kơneăng chơ tơmối ngăn tơnêi tơníu tâ tá Tri Tôn ƀă ki ‘ngêi 50m.

Mơdĭng khinh khí cầu a An Giang

Malối, kơxo hâi lơ 2/9, tơkŭm lối 600 ngế mê cho: kăn ƀô̆, viên chưk, khu lêng kring vế, mâu ƀok jâ phop; ƀă mâu rơxông kuăn pơlê, ối pơtăng chiâng lơgât Việt Nam a plông ki ăm ro tơ’noăng, tơring Tri Tôn, vâ veăng Mơdĭng koh hlá cơ, ƀă môi Hlá cơ Tơnêi têa ai ki kân xŏn 200 met karê châ chuâ têk a ‘ngêi 50 met a hbo plêng; pro chiâng tơnêi tơníu lĕm a kơdâm Phụng Hoàng vâ koh tơbâ hâi Mơjiâng tơnêi têa lơ 2/9. Pakĭng, Mơdĭng rôh kố châ tơkŭm po kong măng Reăng ƀă mâu tơdroăng hơdruê xoâng, mơđah tơbleăng um, mâu kơbong pế pơchên hmê kơchâi ƀă tơkŭm po tơdroăng ki xah hêi tiô khôi vâi krâ nah dêi hdroâng kuăn ngo Khmer vâ tơbleăng ƀă mơđah um méa Tri Tôn troh ƀă tơmối.

A Sa Ly tơplôu ƀă tơbleăng