Kơxo lơ 2/6, Vi ƀan pơlê kong kơdrâm Ƀuôn Ma Thuột tơkŭm po Hneăng hôp mơgêi mâu tơdroăng mơhnhôk Leh tơbleăng kơphế Ƀuôn Ma Thuột roh má 8 hơnăm 2023. Cho tíu ki tơkŭm po, pơlê kong kơdrâm Ƀuôn Ma Thuột hiăng tơkŭm po châ tơƀrê 16/18 tơdroăng ki xiâm dêi Leh tơbleăng kơphế Ƀuôn Ma Thuột roh má 8 hơnăm 2023.

Mâu tơdroăng mơhnhôk dêi leh tơbleăng môi tiah: Hâi leh mơhno khôi túa lĕm, tơ’noăng ivá mâu hdroâng kuăn ngo pơlê kong kơdrâm Ƀuôn Ma Thuột; Mơjiâng tơdroăng App Kơphế ƀă Ôm hyô; Tơkŭm po tíu ôu kơphế tê kơtê a mâu troăng kân Phan Đình Giót; Mơhnhôk mâu tíu ôu kơphế tung lâp pơlê kong kơdrâm ăm ôu kơphế tê kơtê tung pơla tơkŭm po Leh tơbleăng ƀă hía hé...xuân châ pơlê kong kơdrâm Ƀuôn Ma Thuột pêi pro châ tơƀrê, lôi ăm hên tơdroăng ki lĕm tung hiâm mơno tơmối ƀă kuăn pơlê tung kong pơlê.

Ki má môi tung mâu tơdroăng mơhnhôk Leh tơbleăng kơphế Ƀuôn Ma Thuột roh má 8 dêi pơlê kong kơdrâm mê cho pơlê kong kơdrâm hiăng mơhnhôk vâ chê 380 tíu, khu tê mơdró kơphế a 21 cheăm bêng veăng Hâi ăm ôu kơphế tê kơtê, kơphô̆ prôk chêng ôu kơphế tê kơtê ƀă lối 250 rơpâu kơ’lo kơphế tê kơtê châ ăm tơmối troh ôu.

Tiô riân kơnâ lối 6 rơtal liăn. Ing châ tơƀrê dêi hâi uô kơphế tê kơtê a Leh tơbleăng kơphế Ƀuôn Ma Thuột roh má 8, tung la ngiâ, pơlê kong kơdrâm kô rah hâi lơ 10/3 rêm hơnăm cho hâi kơphế tê kơtê a Ƀuôn Ma Thuột, la ngiâ mơjiâng pơlê kong kơdrâm Ƀuôn Ma Thuột chiâng pơlê kong kơdrâm dêi kơphế lâp plâi tơnêi.