VOV4.Xơ Đăng - Kơxo lơ 24/4, a pơlê kong kơdrâm Kon Tum, Khu ngăn mơhno túa lĕm tro, tơ’noăng ivá ƀă ôm hyô tơrŭm ƀă Vi ƀan hnê ngăn kong pơlê Kon Tum tơkŭm po Rôh hôp ‘Ôm hyô Kon Tum – Tíu ki ai hlâu ƀă tơngah’’. Hneăng hôp kố tơ’mot vâ chê 500 ngế kăn veăng cho mâu khu ki rak ngăn, khu ki rơkê ‘na tơdroăng cheăng; Khu tơrŭm, grup pơkuâ khu mơdró kâ djâ tơmối, tíu kâ koi ối pơtê, pơto chơ kế tơmeăm lo ing mâu kong pơlê peăng hdroh Lếo, peăng mâ hâi lo ‘na kơnhŏng Kul ai tơdjuôm troăng tơkăng kong ƀă kong pơlê Kon Tum.

Pôa Nguyễn Văn Hùng, ngế xiâm ngăn Mơhno túa lĕm tro, tơ’noăng ivá ƀă ôm hyô xông tơpui a hneăng hôp

Tơpui a rôh po hôp, Pôa Nguyễn Văn Hùng, ngế xiâm ngăn Mơhno túa lĕm tro, tơ’noăng ivá ƀă ôm hyô tối nhên, Khu xiâm ƀă mâu kong pơlê tung lâp tơnêi têa dế ai hên troăng hơlâ kơhnâ tơkŭm po vâ ‘mâi mơnhông tơdroăng cheăng ôm hyô klêi kơ’nâi ai pơreăng kân COVID-19. Hneăng hôp ‘’Ôm hyô Kon Tum – Tíu ki ai hlâu, loi tơngah’’ cho rôh tơ’lêi vâ khu mơdró kâ trâm mâ, tơpui tơno, kĭ tơkêa tơrŭm tung kơvâ cheăng ôm hyô a kong pơlê.

Katarina Nga tơplôu ƀă tơbleăng