VOV4.Xơ Đăng - Tung 2 hâi (20-21/7) a pơlê kong kơdrâm Ƀuôn Ma Thuột, kong pơlê Dak Lak tơkŭm po tơdroăng trâm mâ mơhno khôi túa lĕm tro vâi hdrêng mâu hdroâng kuăn ngo kơpong peăng Tơdế tơnêi têa – Tây Nguyên. Veăng amê ai 200 ngế teăng mâ cho vâi hdrêng mâu hdroâng kuăn ngo ki rơkê a mâu kong pơlê Dak Lak, Đà Nẵng, Lâm Đồng, Kon Tum, Dak Nông, Gia Lai. Mâu vâi o ôh tá xê to hriâm rơkê mê ối cho mâu ngế pro pơkuâ lâm ki djâ troăng ahdrối, Liên đô̆i trương, Chi đô̆i trương rơkê, đi đo tŏng kum pú hmâ rơtế xông tơtêk rơkê.

Vâi hdrêng ki kơhnâ rơkê châ tơdah hnoăng liăn hriâm rơkê Vừ A Dính

Akố, mâu ngế teăng mâ châ veăng kơmăng xah hêi ƀă châ ngăn mâu tơdroăng hơdruê xuâng, ki má môi pêng păm khôi túa lĕm tro hdroâng kuăn ngo xua mâu khu ki veăng mơđah tơbleăng hơdruê xuâng; veăng mâu tơdroăng trâm mâ tơpui tơno, ti tăng plĕng mâu khôi túa ki má môi dêi kơpong ƀă hía hé.

Mâu vâi o châ ti tăng plĕng ‘na khôi túa lĕm mâu hdroâng kuăn ngo

Roh kố, Khu xiâm pơkuâ Đoân Droh rơtăm Kŏng san Hồ Chí Minh diâp ăm tơmeăm plông kơtú ƀalong pơlê pơla kơnâ 150 rơtuh liăn ƀă hngêi Kên pâng rơnŏng khêi kơnâ 80 rơtuh liăn ăm kong pơlê Dak Lak. Kơxô̆ liăn hnoăng liăn rơkê Vừ A Dính diâp ăm 50 hnoăng liăn hriâm rơkê kơnâ 50 rơtuh liăn ăm 50 ngế vâi hdrêng hdroâng kuăn ngo kơpong peăng Tơdế tơnêi têa – Tây Nguyên.

A Sa Ly tơplôu ƀă tơbleăng