VOV4.Xơ Đăng - A Hngêi xiâm Mơhno túa lĕm tro kong pơlê Dak Lak, Khu xiâm ngăn ‘na Ngê̆ thuât Mơđah-Khu xiâm ngăn ‘na mơhno túa lĕm tro, Ivá ƀă Ôm hyô tơrŭm ƀă Vi ƀan hnê ngăn kong pơlê Dak Lak, Khu Nhak sih Việt Nam, Khu xiâm ngăn ‘na kơhnhon xuâng Việt Nam nếo tơkŭm po Mơđah Hơdruê xuâng lâp tơnêi têa hơnăm 2021 hneăng 2.

Mơđah hơdruê xuâng, rêi prôa lâp tơnêi têa hơnăm 2021 hneăng 2, tơkŭm lối 1.000 ngê̆ sih, mơngế mơđah lo ing 22 khu hơdruê xuâng lâp tơnêi. Rêm khu hiăng veăng mơđah môi tơdroăng, ton sap ing 65 troh 110 phut, tung mê, ai hên ngê̆ thuât cho hơdruê, xuâng, rêi prôa giao hưởng, nhạc vũ kịch, thanh xướng kịch. Sap ing hâi kố troh tâi hâi lơ 30/6, mâu khu kố tơ’noăng vâ tăng rah xo khu ki rơkê ƀă hnối diâp huy chương, mê dái.

Diâp reăng ƀă tơmeăm tơbâ ăm khu pơkuâ ngăn hơdruê xuâng

Tiô ngê̆ sih ưu tú Trần Ly Ly, pôu râng hnoăng cheăng xiâm Nghệ thuật Biểu diễn, Kăn pơkuâ xiâm hneăng mơđah kố, klêi kơ’nâi ton khế hơnăm xua ai tơdjâk ing pơreăng COVID-19, mâu khu ki veăng mơđah mê hiăng ai troăng prôk ki hơ’lêh dêi tơná kơhnâ khât vâ mơhno tối tơdroăng ki hâk git kơ hnoăng cheăng, mơhno tối mâu tơdroăng ki rơkê ƀă mơhno tối hiâm mơno pói vâ, mơđah tơbleăng dêi hnoăng.

“Mơđah hơdruê xuâng rêi prôa ki rơkê khât lâp tơnêi têa klêi kơ’nâi tro tâ pơreăng kân COVID, mê hiăng pơtối po nếo hneăng ki mơđah má 2, ai 22 khu ki veăng, tiô kơ tơdroăng ki tơniăn lĕm vâ mơnhông văn hóa nghệ thuật xuân cho vâ mơhno tối tơdroăng ki thăm po rơdâ tơdroăng ôm hyô Việt Nam. Rêm ngế hbrâ mơđah cho khât khih ‘nâng ƀă mâu nghệ sĩ ƀă hiâm mơno pói rơhêng vâ chiâ pleăng dêi hnoăng cheăng tơná ki hiăng hâk git.

Á tơmiât tiah kố, ƀă hiâm mơno pói rơhêng vâ tiah nôkố, mê tơdroăng mơđah kố kô châ ai ki ƀlêi chiâng, ƀă ki rơkê luâ hên tâ hneăng hdrối mê hía nah’’.

Khu hơdruê xuâng Dak Lak tơ’noăng apoăng

Klêi kơ’nâi Leh pơxiâm po, Khu hơdruê xuâng kuăn ngo dêi kong pơlê Dak Lak hiăng pơxiâm po mơđah a kơmăng. Dó inâi ‘’Mâu um méa Bazan khêi’’, Khu hơdruê xuâng Dak Lak hiăng pơroh 11 tơdroăng ki ro rih, mơhno tối um méa, mơngiơk ƀă tơdrá dêi Tây Nguyên ki kân kĕng, ó rơdêi.

Mâu tơdroăng mơđah cho kân krip, ai hên túa ngê̆ thuât lĕm ro

Tơdroăng ki hbrâ rơnáu, mơđah tơtro cho khât dêi mâu ngê̆ sih, mơngế ki mơđah rơtế ƀă idrâp chêng koăng, mâu prôa, rơvŏng hlŭm dêi hdroâng kuặn ngo hiăng pơtroh ăm chôu phut ki ro rih, mơhno pro ƀriê phoih tung hiâm mơno, châ tơdroăng ki tríu hâk ki ro khât dêi mâu ngế ki ngăn.

Ca sĩ Y Hoắt Byă, ngế ki hơdruê xuâng dêi hdroâng kuăn ngo Dak Lak ai tối:

‘’Ngin hiăng kơdo mơ-eăm ó ‘nâng ƀă mơđah tơbleăng tâi ivá mợno tơná tung hneăng mơđah hâi kố, hlo ngin mơđah mê kuăn pơlê ki ngăn xuân têa kŏng mê ngin mơđah thăm ro rih khât’’.

H’Xíu H’Mok chêh

Nhat Lisa tơplôu ƀă tơbleăng