VOV4.Xơ Đăng - Kong pơlê Dak Nông dế thâ hbrâ ăm Hneăng hôp lâp plâi tơnêi ‘na kiâp hmốu ngo on roh má 20 (ISV 20) kô tơkŭm po a mơ’nui măng tĭng kố, veăng amê ai tâi tâng mâu kong têa ối tung khu tơrŭm dêi tơdroăng kơdrum reăng kiâp hmốu lâp plâi tơnêi UNESCO. Tiô pơkâ pêi, Hneăng hôp lâp plâi tơnêi Kiâp hmốu ngo on roh má 20 kô châ tơkŭm po sap hâi lơ 22 – 26/11/2022.

Pói tơngah mơnhông mơdêk ôm hyô ing kiâp hmốu ngo on Kơdrum reăng kiêp hmố UNESCO Dak Nông

Mâu tơdroăng pêi a hneăng hôp, tơpui tơno, mơđah tơbleăng, mơhnhôk pêi ôm hyô kô châ tơkŭm po a Tíu xiâm hneăng hôp kong pơlê Dak Nông. Tiô jâ Tôn Thị Ngọc Hạnh, Kăn phŏ hnê ngăn Vi ƀan kong pơlê Dak Nông, tơdroăng tơkŭm po Hneăng hôp lâp plâi tơnêi ‘na kiâp hmốu cho roh tơ’lêi vâ kong pơlê tơbleăng châ tơƀrê um Kơdrum reăng kiâp hmốu lâp plâi tơnêi UNESCO Dak Nông troh pú hmâ lâp plâi tơnêi.

Kố xuân cho roh vâ kong pơlê thăm hriăn plĕng khoa hok ‘na kiâp hmốu ngo on, kum rak vế ƀă xúa châ tơƀrê mâu tơmeăm ki kơnâ lâp plâi tơnêi dêi kong pơlê.

A Sa Ly tơplôu ƀă tơbleăng