VOV4.Xơ Đăng - Kơmăng lơ 19/6, Khu pơkuâ Đoân Droh rơtăm Pơlê kong kân Đà Nẵng tơrŭm ƀă Kâu lăk ƀô̆ Tsubasa (Khu tơrŭm droh rơtăm pơlê kong kân’’ tơkŭm po ‘’Leh mơdĭng trâm mâ tơpui tơno ‘na khôi túa lĕm tro Việt Nam – Nhuk, Tsubasa Matsuri 2022’’ mơhnhôk vâ chê 700 ngế droh rơtăm, sinh viên a mâu hngêi trung kao đăng ƀă đăi hok tung pơlê kong kơdrâm veăng. Kố cho tơdroăng pêi klăng leh tơbâ 50 hơnăm mơjiâng tơrŭm tơpui kâ Việt Nam – Nhuk.

Khu pơkuâ Đoân droh rơtăm Pơlê kong kân Đà Nẵng tơkŭm po ‘’Leh hô̆i trâm mâ tơpui tơno mơhno túa lĕm tro Việt Nam – Nhuk’’

Leh mơdĭng trâm mâ tơpui tơno mơhno khôi túa lĕm tro Việt Nam – Nhuk hiăng vêh pro pêng păm tơdroăng rêh ối tíu mơhno khôi túa lĕm tro ki phá tơ-ê dêi Nhuk, mơđah tơbleăng ƀă tơbleăng tíu ôu têa chếi ngê̆ thuât kong têa Nhuk, ngê̆ thuât hdôu hlá mơ-éa Origami, kơpong mơđah tơbleăng hơ’muăn um kong têa Nhuk, mơđah tơbleăng ếo pơtâk tiô khôi vâi krâ nah Việt Nam – Nhuk, mâu tơdroăng xah hêi tiô khôi vâi krâ nah ƀă tơ’noăng hơdruê xuâng pơla mâu tíu cheăng.

Khu pơkuâ Đoân Droh rơtăm Đà Nẵng tối ăm ‘nâi: Ing tơdroăng pêi kố kum mâu rơxông ối nếo hlê plĕng tơ’nôm ‘na khôi túa ki má môi kong têa Nhuk, ai tíu hriâm tâp nâl tơpui, ing mê kô chiâng kông tơdjêp pơla Nhuk ƀă Việt Nam.

A Sa Ly tơplôu ƀă tơbleăng