VOV4.Xơ Đăng - Leh pơxiâm po SEA Games 31 kô tơkŭm po a plông kơtú ƀa long Mỹ Đình a kơmăng lơ 12/5. Tâi tâng khu vĕ mot ngăn leh pơxiâm po, mơgêi, roh tơ’noăng má mơ’nui ƀă tơbriât kâ mê dái hâu môn tơ’noăng ƀa long mơngế kơnốu SEA Games 31 kô ối tung hnoăng pơkuâ dêi khu tơkŭm po hneăng hôp. Pơtối mê, Khu tơkŭm po kô ôh tá tê vĕ leh pơxiâm po, bu tê dâng 20 rơpâu kơtâ vĕ ăm tâi tâng mâu ngế châ krếo ngăn, mâu ngế tơ’noăng, khu tơ’noăng mâu kong têa troh plông kơtú ƀalong Mỹ Đình.

Tiô tơdroăng tơkŭm po, klêi kơ’nâi leh prôk pơtăng dêi 11 khu tơ’noăng ivá, tiô tối hdrối, pôa Phạm Minh Chính, Ngế pro xiâm hnê ngăn Chin phuh kô tơbleăng pơxiâm po SEAGames 31. Khu tơkŭm po hiăng tơbleăng luât tơ’noăng, mơ-éa hnê mơhno, chôu phut tơ’noăng dêi mâu môn; tơdah kĭ dêi 7.878 ngế kăn ƀô̆, ngế hnê tơ’noăng, mâu ngế tơ’noăng 11 kong têa; krếo 1.299 ngế ngăn tơ’noăng, séa ngăn, mâu kăn cheăng kih thuât lâp plâi tơnêi; 2.502 ngế chêh hlá tơbeăng tung tơnêi têa ƀă kong têa ê; hbrâ 31 hngêi ăm tơmối kâ koi ối pơtê pro tíu ối pơtê ăm mâu khu tơ’noăng ƀă hía hé.

A Sa Ly tơplôu ƀă tơbleăng