VOV4.Xơ Đăng - Xuân tiô khôi hmâ sap ing ton nah, a rơnó kố hmâ po mơdĭng “Lo lăm pêi klâng”. Mâu hơnăm achê pơla kố, khu kăn pơkuâ hnê ngăn Đảng ƀă Tơnêi têa pin xuân veăng tung mơdĭng “Lo lăm pêi klâng” a mâu kong pơlê. Tơdroăng kố kô cho tơdroăng ki pơtối dêi tơdroăng nếo ai kơxo kố.

*** Sap ing ton nah, tiô khôi túa lĕm tro dêi Việt Nam hiăng ai mơdĭng Lo lăm pêi klâng. Rơtế ƀă tơdroăng ki tơbleăng Têt pêt loăng, kăn xiâm hnê ngăn tơnêi têa hneăng hdrối Hồ Chí Minh xuân hiăng veăng tung mơdĭng Lo lăm pêi klâng; Pôa hiăng chu a klâng vâ pơchoh klâng ƀă vâi krâ nhŏng o kuăn pơlê ki pêi chiâk deăng.

Hơnăm 2009, klêi kơ’nâi vâ chê 100 hơnăm pơtê tơkŭm po, leh Lo lăm pêi klâng châ vêh ‘mâi mơnhông a cheăm Đọi Sơn, tơring Duy Tiên, kong pơlê Hà Nam. Ing mê troh nôkố, rêm hơnăm, hmâ a rôh ki kố, kăn pơkuâ hnê ngăn Đảng ƀă Tơnêi têa pơrá veăng tung mơdĭng Lo lăm pêi klâng, lăm a klâng pơchoh rơtế ƀă kuăn pơlê ki pêi chiâk deăng.

*** Mơdĭng lo lăm pêi klâng Đọi Sơn hơnăm kố châ tơkŭm po tung 3 hâi, ing hâi má 5 troh má 7 khế môi, hơnăm Nhâm Dần. Tung mê , hâi má 5 ƀă má 6 khế Môi tơkŭm po mâu hâi mơdĭng rơkâu pâ tiô tuăn loi môi tiah Mơdĭng rơkâu pâ jâ pôa, Mơdĭng nô̆ng têa troh a tíu Tơbâ vâ xối, Mơdĭng rơkâu pâ tơniăn lĕm dêi mâu ki tiô khôp Phop, Mơdĭng rơkâu pâ hơniâp lĕm a hngêi chuô Đọi Sơn ƀă hiá hé...

Hâi má 7 khế Môi cho hâi mơdĭng khât. Klêi pơxiâm po mơdĭng, khu tơkŭm po kô tơbleăng ƀă hlối diâp ƀâng ăm mâu cheăm ki châ mơnhên tối thôn pơlê nếo tiô túa nếo dêi kong pơlê Hà Nam hơnăm 2021. Vâ rak tơniăn ‘na tơdroăng cheăng hbrâ mơdât pơreăng COVID-19, mâu tơdroăng cheăng a peăng pro Mơdĭng hơnăm kố châ pro môi nâ, bú ối tơkŭm po mơdĭng kơchuâ, rơnuâ kơpôu; mơđah tơmeăm um tơmeăm hâi Mơdĭng mâu kuăn kiâ, nhâ loăng pơlê kong krâm; tơbleăng a mâu tíu tơbleăng tơmeăm pêi lo ing chiâk deăng, tơmeăm pêi lo ƀă kơmăi kơmok dêi pơlê kong krâm.

*** Mơdĭng Lo lăm pêi klâng Đọi Sơn châ ngăn cho hâi mơdĭng lăm chu a klâng kân má môi kơpong tơbăng Peăng Kơnhŏng. Châ tơkŭm po rêm hơnăm a rơnó hơngui, mơdĭng kố cho tơdroăng ki kơnía ó khât, veăng kum hnê mơhnhôk kuăn pơlê ki pêi chiâk deăng ƀă mơhno tối hiâm mơno ‘nâi pâ mơnê mâu khu ki hdrối nah tung tơdroăng ki po pông klâng, vâ mơdêk hiâm mơno achê ƀă kuăn pơlê, nhuô̆m kuăn pơlê ki pêi chiâk deăng.

Hơnăm 2022, drêng tơbâ 1.035 hơnăm hâi pơtáu Lê Đại Hành mơjiâng mơdĭng pơchoh klâng chiâk ki kân rơdâ a chêng ngo Đọi Sơn (nôkố cho cheăm Tiên Sơn, pơlê kong krâm Duy Tiên). Kố xuân cho hơnăm ki má 13 mơdĭng châ kăn pơkuâ pơlê kong krâm tơkŭm po.

Vâ mơdĭng kố châ tơƀrê ƀă ai pơxúa khât. Khu tơkŭm po mơdĭng hiăng xing xoăng hnoăng cheăng, krá rơdêi ăm mâu tíu pêi cheăng ki ai tơdjâk; hnê mơhnhôk mâu kăn ƀă tơmối test COVID-19 hdrối vâ mot tung rôh mơdĭng; xing xoăng tíu ki quet mah QR Code vâ séa ngăn pơreăng.

Gương - Katarina Nga tơplôu ƀă tơbleăng