VOV.Xơ Đăng - Têt Trung thu po a khế 8 âm lĭt tiô mâ khế rêm hơnăm cho rôh leh ăm vâi hdrêng, la xuân ai hên ngế púi tơngah, kố ôh tá xê cho rôh vâ vâi hdrêng châ xah hêi ro, ro châ xah mâu tơmeăm, xah têk on tơdrong, tiê̆n sih hlá mơ-éa, kế truâ ngiâ ƀă klá pơmôm, xuâng prếo kơmăng khế mơ-niâ... mê ối cho rôh vâ mâu ngế tung rêm rơpŏng hngêi rơtế châ xah hêi ro vâ mơnúa kâ mâu kơƀăn trung thu ki ngeăm kơhiâm. Tơkéa vâ tối, rêm tíu tung lâp tơnêi têa ai môi túa tơdah Têt Trung thu pơrá phá, la tơviah ro mê vâ tối troh túa ki kuăn pơlê Tuyên Quang tơkŭm xah ro Trung thu rêm hơnăm.

Ôh tá xê to péa hâi lơ 14,15 khế tơheăm, Leh xah hêi Thành Tuyên hiăng tơkŭm po sap hâi lơ 4/9 a Tuyên Quang ƀă hên tơdroăng pêi mơhno khôi túa lĕm má môi, pêng păm tơdroăng pro ăm vâi hâk. Tung plâ hên hơnăm hiăng hluâ, kơmăng ki lâi mâu vâi o ối kŭn a Tuyên Quang xuân châ ‘nân a pêng mâu toăng rơxế pro krâ on tơdrong trung thu ki lĕm phá tơ-ê, djâ prôk mâu troăng kân ki xiâm dêi pơlê kong kơdrâm.

Châ hơdruê, xuâng tiô tơdrá prôa tung mâu toăng rơxế ki krâ on tơdrong hên mơngiơk lĕm, châ veăng mâu kế xah hêi tơmiât troh kơmăng khế mơniâ, mâu vâi o ối kŭn bố bố xuân hâk vâ rơhêng troh.

“Hơnăm kố tôh ngin kuăn pro on um prếo. Kố cho roh má 2 á kuăn châ ‘nân tung kế ki pro, á hêng ‘nâng. Hơnăm kố á châ lăm 6 xôh a kế ki pro hiăng prôk lâp pơlê kong kơdrâm’’.

Ƀă kố cho rơkong dêi môi ngế ối kŭn ki ê:

“Kơtâo dêi á hơnăm kố pro um kơchêp ki vâ chiâng prếo. Kố cho roh má 2 á kuăn châ ‘nân tung kế ki pro, mâu kế ki pro lĕm mơnâ mâ ngăn ‘nâng, á kuăn vâ hơnăm kố hên ngế kheăn kơdeăn kế ki kơtâo kuăn pro’’.

Mâu kế ki pro on tơdrong châ kuăn pơlê tơmiât pro rơkê xo ing tơdroăng mơnhông mơdêk, tơdroăng hơ’muăn vâi krâ nah ƀă ing tơdroăng rêh ối nôkố, pêi cheăng pêt mơjiâng tơmeăm dêi kuăn pơlê tung rêm hneăng mơnhông mơdêk môi tiah: Prếo mêa veăng hâi leh xah hêi Thàng Tuyên, Song Lân veăng hâi leh, Kơchêp vâ chiâng prếo, kơnái pơkoăng, chêm ngô̆ng hơkâ hlái ƀă hía hé. Hên kế châ xúa khoa hok kŏng ngê̆ tiô rơxông nếo mê xuân ối rak khôi túa lĕm tro dêi pơlê xiâm Tuyên Quang ƀă hdroâng mơngế Việt Nam.

Rêm kế ai djâ tơdroăng ki kuăn pơlê vâ pơtroh, mê cho pói vâ vâi hdrêng – mâu ngế ki pêi cheăng la ngiâ hlê plĕng tơdroăng mơnhông mơdêk, hriâm tâp pôa pâ mơjiâng tơnêi têa.

Ngin hiăng thâu rơkong tơpui dêi kuăn pơlê phiu ro hơ’muăn ‘na kế ki pro dêi tơná:

“Kế ki pro dêi tôh 1 bêng Tân Quang cho mơheăm Lạc hồng, kế ki pro djâ tơdroăng vâ ăm vâi hdrêng hlê plĕng xiâm rêi kuăn prếo muăn xeăng, pói vâ ăm mâu kuăn pơtối chêng pâ pôa vâ tơnêi têa rế hía rế kro mơdrŏng rơdêi mơnhông mơdêk hơhngế tâ’’.

“Kế ki pro dêi ngin cho kế pro ‘na kơpong kuăn pơlê rêh ối pêi chiâk deăng, ai xúa kŏng ngê̆ 4.0 vâ djâ klâng chiâk, pro ti lâi vâ kơdroh pêi xúa chêng kŏng, mê mơdêk pêi lo tơmeăm châ hên. Ing mê ngin pói vâ rơxông ối nếo ‘nâi hnoăng dêi mâu ngế ki prôk hdrối, pro tơdroăng ki loi tơngah ăm rơxông ối nếo, ai tơdroăng rêh ối nếo vâ kuăn muăn cháu chái drêng xông kân pâ mâu pơ’leăng phái hiăng păn roăng vâ xông kân, vâ mơnhông mơdêk a râ ki nếo’’.

On tơdrong trung thu djâ lăm hêi kơphô̆

Prôk pakĭng kế ki pro on tơdrong trung thu lăm rơtâ tá pơlê kong kơdrâm, kuăn pơlê xâp mâu hmân ếo dêi mâu hdroâng kuăn ngo – rơtế dêi pó kohnhon xuâng, pro chiâng phiu ro. Hên ngế kuăn pơlê tối tơdroăng ki kố mơhno tơdroăng rŭm môi tuăn pơla mâu hdroâng kuăn ngo rơtế rêh ối tung kơpong tơnêi Thành Tuyền.

Jâ Phùng Thị Hoan, ối a tôh 15, bêng Tân Quang, pơlê kong kơdrâm Tuyên Quang tối ăm ‘nâi:

“Á sâp hmân ếo hdroâng kuăn ngo Mèo. Kố cho plâ hmân ếo Thái. Nâ o pơrá xâp hmân ếo hdroâng kuăn ngo, rêm tôh, rêm bêng pơrá ai mơngiơk krê, vâi xâp hmân ếo hdroâng kuăn ngo teăng mâ ăm mâu hdroâng kuăn ngo kong pơlê Tuyên Quang, pói vâ Tuyên Quang đi đo rak tơdroăng rŭm môi tuăn rơtế dêi pó djâ kong pơlê rế hía rế kro mơdrŏng’’.

Mâu hâi hiăng hluâ, kơdrâm tơmối ing lâp lu tơnêi têa troh ƀă pơlê kong kơdrâm Tuyên Quang vâ veăng leh xah hêi ƀă châ kâ kế ki kơhiâm dêi kong pơlê. Mâu kế ki pro tơ-ê dêi pó, kân kŭn hên túa, tơdroăng mơhno pa kong lĕm ôh tá xê to ăm vâi hdrêng ối kŭn hâk mê ối pro ăm tơmối hâk vâ:

“Tâk troh a Tuyên Quang á tâ phiu ro ‘nâng hâi leh xah hêi, ôh tá ƀĕng ê ki lĕm kân dêi tơdroăng po leh. Mâu kế ki pro hên hĭn, ing mâu kế ki pro achê khôi vâi krâ nah môi tiah kơchêp, on tơdrong, lơ pro um prếo, kế pro tiô khôi vâi krâ nah môi tiah kơnái pơkoăng, mê á nếo hlo kuăn pơlê a Tuyên Quang rêm ngế rak khôi túa kơnía dêi hdroâng kuăn ngo, leh xah hêi trung thu châ kuăn pơlê tơmâng troh mê á tơmiât rêm ngế tơmâng khât troh vâi hdrêng’’.

Hên rơpŏng hiăng djâ kuăn ‘nĕng troh ngăn ‘na trung thu tiô khôi vâi krâ nah dêi hdroâng kuăn ngo a pơlê kong kơdrâm Tuyên Quang, Leh xah hêi ki iâ a tíu ki ê ai. Nâ Nguyễn Thị Thu Trang, ối a Hải Phòng ƀă mâu kuăn nâ tối:

“Veăng troh xah hêi trung thu Tuyên Quang, á o hlo vâi hdrêng hâk vâ ‘nâng, trung thu mơngế kân ăm mâu vâi o ối kŭn. Tâng ai liăn ngân á kô tâk amê vâ xah hêi a Tuyên Quang roh Trung Thu, vâ mâu kuăn xuân ai tơdroăng ki tơbâ, vêh ah hơ’muăn ăm mâu pú hmâ tơdâng rơxông a Hải Phòng’’.

Tơdroăng dêi Leh xah hêi Thành Tuyên kơdrâm kơdrĕng phiu ro lâp kơphô̆  bêng, pêng păm mơngiơk lĕm, tơdrá prôa hâi leh xah hêi – môi khôi túa ki lĕm tro má môi, kum vâ Tuyên Quang tơbleăng ƀă kuăn pơlê ƀă tơmối tung tơnêi têa ƀă kong têa ê ‘na um pơlê xiâm, kuăn mơngế, ki rơhêng vâ tối cho mâu kế ki kơnâ khôi túa lĕm tro, tơdroăng mơnhông mơdêk, khôi túa lĕm dêi pơlê xiâm kăch măng.

VOV1 chêh

A Sa Ly tơplôu ƀă tơbleăng