Leh mơđah hlá tơbeăng rơnó Hơngui Giáp Thìn kong pơlê kong Tum hơnăm 2024 tơbleăng ăm mâu mơngế ki vâ pơchuât ngăn hlá tơbeăng ai lối 500 hlá tơbeăng rơnó Hơngui dêi vâ chê 80 Khu chêh hlá tơbeăng tung lâp tơnêi têa, kơ koan chêh hlá tơbeăng tung kong pơlê ƀă kong pơlê ki ê. 

Tối tơbleăng a Leh pơxiâm po, jâ Y Ngọc, Kăn phŏ hnê ngăn Vi ƀan kong pơlê Kon Tum tối, mâu kơ koan chêh hlá tơbeăng tung kong pơlê rơtế teăng mâ mâu kơ koan thong tấn, hlá tơbeăng xiâm tơnêi têa ki ối tung kong pơlê hiăng ai hên pơ’lêh nếo tung pêi tơdroăng kal kí, mơdêk hnê kuăn pơlê hlê plĕng, veăng mơnhông cheăng kâ-rêh ối dêi kong pơlê.

Kăn phŏ hnê ngăn Vi ƀan kong pơlê Kon Tum, púi vâ mâu kơ koan thŏng tấn, hlá tơbeăng, hnê tối tơdroăng mơ-eăm tâ nếo vâ hriĕn chêh mâu bai ki tro ‘ló tâ, tơƀrê tâ; tơbleăng, mơhno ki mơnhông tơƀrê dêi kong pơlê.