Veăng tung rôh tơ’noăng vo plong loăng tiô khôi hmâ pơlê kong kơdrâm Kon Tum po rơdâ hơnăm kố ai 11 khu tơ’noăng ƀă 60 ngế tơ’noăng. Mâu khu  tơ’noăng vo plong lo ing 9 to cheăm, bêng dêi pơlê kong kơdrâm Kon Tum ƀă 2 tơring: Sa Thầy, Ia H’Drai. Mâu khu tơ’noăng vo plong a 2 tơdroăng: 200m ƀă 1.500m.

Rôh tơ’noăng kố cho vâ mơhnhôk mâu ngế tơ’noăng trâm mâ, tơpui tơno, rak vế ƀă mơnhông mâu môn tơ’noăng ivá hdroâng kuăn ngo, bro chiâng ivá tơ’noăng apoăng hơnăm nếo ƀă koh tơbâ 110 hơnăm mơjiâng pơlê kong kơdrâm Kon Tum.

Klêi kơ’nâi mâu rôh tơ’noăng, péa ngế tơ’noăng cheăm Sa Bình, tơring Sa Thầy châ krâ pri ối má Môi cự ly 1.500m. Khu tơkŭm po diâp pri ăm khu ki ai hên plong tơ’noăng má môi cho khu tơ’noăng vo plong cheăm Sa Bình ƀă khu tơ’noăng vo plong cheăm Kroong, châ kâ pri ối má Môi tung tâi tâng khu.