Po sap ing hâi lơ 26/12/2022 ƀă ton troh Têt Dương lịch 2023, Măng tĭng Mơhno túa lĕm tro – Ôm hyô Mang Deang hơnăm 2022 châ Vi ƀan hnê ngăn tơring Kon Plông, kong pơlê Kon Tum tơkŭm po a Kơpong ôm hyô kong kế nhâ loăng tơnêi têa Mang Deang hiăng tơ’mot hên tơmối troh hyô ngăn mơhno túa lĕm tro Tây Nguyên.

O Lương Phạm Việt Anh, tơmối lo ing kong pơlê Dak Nông, ăm ‘nâi troh Mang Deang, Việt Anh hiăng châ ngăn mâu khu ngê̆ nhân Rơteăng tŏn mâu chêng koăng, kơhnhon xuăng, tŏn rêi mâu prôa tiô khôi hmâ ƀă tâ hơniâp ro khât ƀă kuăn pơlê a tíu kố.

“Tiô tung hiâm mơno á hlo, tơviah xuân ai, hmâ xuân ai xua hngêi á lăm prôk ối pơhlêh ƀă Tây Nguyên rêh ối mê á xuân chiâng môi ngế kuăn dêi Tây Nguyên. Á hlo ƀriê khât cho hâk vâ kuăn mơngế akố. Rêm ngế akố pơrá hơniâp lĕm, hâk git kơ tơmối”.

Tung hên tơdroăng cheăng châ tơkŭm po a kơpong ôm hyô kong kế nhâ loăng tơnêi têa Mang Deang rôh pơtê hơnăm nếo 2023, tơ’mot tơmối hên má môi cho ‘na mơhno túa lĕm tro “Thiên đường Tây Nguyên”.

 Akố a kong loăng hngó, ai 5 Kuât dêi mơngế Rơteăng kơvâ Mơ Nâm ƀă Ca Dong châ bro. Rơtế ƀă mê cho lối hrĭng to kế tơmeăm ki hmâ tơtro ƀă tơdroăng rêh ối dêi kuăn pơlê châ mơđah tơbleăng. O Nguyễn Ngọc Thủy Trang, sinh viên hơnăm má 2 Đại học FPT a Pơlê kong kân Hồ Chí Minh, ăm ‘nâi:

“Kố cho rôh apoăng á châ troh a Mang Deang, á hlo tơdroăng rêh ối dêi kuăn pơlê a kố cho hơniâp ro khât. Maluâ vâi ối kal ai hên mâu kế tơmeăm la ‘na hiâm mơno vâi hiăng châ tơkŭm. Mâu ngế kuăn pơlê mê vâi đi đo môi rôh kâ hmê phâi tơtô ƀă dêi rơpó. Á hiăng lăm troh Đà Lạt ƀă á hlo Mang Deang ôh tá môi tiah Đà Lạt, gá ai mâu tíu ki hơniâp ro tơviah Đà Lạt. Tung la ngiâ mê á kô vêh a Mang Deang nếo ƀă djâ tơvế môi ngế ki lâi ‘lo xuân ai”.

Pôa Đặng Đình Toán, ngế ki pơkuâ Ƀơrô cheăng Mơhno túa lĕm tro ƀă Tơbleăng tơdroăng kal tơring Kon Plông ăm ‘nâi, vâ tơ’mot kuăn pơlê xuân môi tiah tơmối troh hyô ngăn ‘na mơhno túa lĕm tro Tây Nguyên a Kơpong ôm hyô kong kế nhâ loăng hiăng ai tơdroăng ki ‘no liăn cheăng tơniăn.

Rơtế ƀă mê, tơrŭm ƀă khu ki pơchoh hmân ếo Minh Hạnh ƀă khu ki tí tăng tơkŭm kế tơmeăm ton nah Tây Nguyên, Đặng Minh Tâm kơchuâ, mơđah tơbleăng môi kơbong mơhno túa lĕm tro Tây Nguyên ki kŭn a Mang Deang.

“Ing tơdroăng ki mơhno túa lĕm tro dêi ngin kố mê ai môi tơdroăng ki rơhêng vâ pơtroh troh tâi tâng tơmối mê cho tơdroăng ki rak vế, mơdêk mâu ki kơnía ‘na mơhno túa lĕm tro khôi hmâ tro tiô pơlâ ki a Rôh hôp mơhno túa lĕm tro lâp tơnêi têa hơnăm 2021 pôa Nguyễn Phú Trọng, kăn xiâm pơkuâ ngăn hnê ngăn Đảng hiăng pơkâ thế, mê cho mơhno túa lĕm tro ki kal dêi hdroâng kuăn ngo, mơhno túa lĕm tro djâ troăng ăm kuăn pơlê lăm ƀă mơhno túa lĕm tro ối mê hdroâng kuăn ngo xuân ối.

Mê cho mâu tơdroăng ki má môi ki ngin rơhêng vâ pơtroh troh ăm tơmối drêng troh pôu tơnêi tơníu mơhno túa lĕm tro a tơring Kon Plông”.