Vi ƀan pơlê kong kơdrâm Kon Tum, kong pơlê Kon Tum nếo pơxiâm po tơ’noăng mơngiơk hmôu, jiâ, ếo, pơtâk rôh má II ƀă tơbleăng Pơlê ôm hyô tung pơlê dêi Kon Jơ Dri.  Kố cho môi tung hên tơdroăng cheăng dêi pơlê kong kân koh tơbâ 110 hơnăm hâi mơjiâng kong pơlê Kon Tum lơ 09/02. Klêi leh pơxiâm po, tơmối ƀă kuăn pơlê châ ngăn vâi mơđah 7 túa ếo pơtâk  xiâm dêi 7 hdroâng kuăn ngo a kong pơlê Kon Tum: mê cho Rơteăng, Bơhnéa, Jêh -Triêng, Jarai, Rơ Măm  ƀă H’rê.

Tơdrêng a mê peăng mơđah ếo pơtâk sâp rêm hâi ƀă ếo pơtâk tĕn ton nah ki ‘mâi rơnêu rơneăm lĕm tơviah. Khu tơkŭm po hiăng krếo 38 ngế ki rơkê má môi  lo ing 10 to cheăm, bêng dêi pơlê kong kơdrâm Kon Tum troh ngăn mâu  túa ếo pơtâk ki teăn.  Xuân tung rôh kố, Vi ƀan hnê ngăn kong pơlê Kon Tum hiăng tơbleăng Pơlê Ôm hyô Kon Jơ Dri, cheăm Đăk Rơ Wa. Kố cho pơlê ôm hyô ki má pái dêi pơlê kong kơdrâm Kon Tum.