VOV4.Xơ Đăng - Tung mâu tơdroăng pêi pro ‘na hâi xối tơbâ pơtáu Hùng hlâ lơ 10/3 âm lịch, Tíu mơđah tơbleăng um tơmeăm ton nah dêi Tơnêi têa hiăng tơkŭm tơdroăng tour ‘’Vêh a rơxông Hồng Bàng’’ tá mâu tơdroăng tí tăng ‘nâi plĕng a chal mơjiâng tơnêi têa dêi khu pơtáu Hùng rơtế ƀă mâu tơdroăng vêh pêi pro ‘na khôi túa tơlá ton nah tung xối mơdĭng dêi mơngế Xuăn ton nah. Tung hâi apoăng tơbleăng, tour ‘’Vêh a rơxông Hồng Bàng’’ hiăng tơ’mot hên ngế kuăn pơlê vâ ’nâi vâ ngăn.

Roh apoăng veăng prôk xah hêi ‘’Vêh rơxông Hồng Bàng’’, ngoh Phạm Văn Tuấn, hriâm hngêi trung Sih quan luk kuân 1, Khu xiâm pơkuâ mô đô̆i gak tơkăng kong rơtế mâu khu pú ai roh ti tăng nhên ‘na tơdroăng mơnhông mơdêk mơjiâng tơnêi têa ƀă rak tơnêi têa dêi mâu Pơtáu Hùng xuân môi tiah ti tăng plĕng tơmeăm kơnía tơnêi têa Hơkâ  hlái Ngọc Lũ, tơnâp tuk Việt Khê ing mâu tơdroăng lăm ngăn tơmeăm mơđah tơbleăng:

‘’Ing tơdroăng prôk lăm xah hêi kố kum ngin hlê plĕng trâu hơngế tơdroăng mơnhông mơdêk dêi hdroâng mơngế, ía ‘nâng, mơnê mâu rơxông jâ pôa hiăng pleăng hnoăng mơjiâng, rak vế. Tơdroăng kố rế hía rế kơnâ tâ drêng tro a drêng tâi tâng hdroâng mơngế dế tơmiât troh hâi tơbâ hâi pơtáu hlâ lơ 10 khế 3’’.

Klêi kơ’nâi tơdroăng lăm ngăn, mâu ngế hriâm hngêi trung Sih quan Luk quân 1 châ hnê mơhno, veăng châ tâ tơdroăng khôi túa lĕm dro dêi kuăn pơlê Việt ton nah ‘’Pêi báu ƀă loăng pêi ki tơpéa’’ (tơ’noăng pêi báu, um phái) rup ká pah tung peăm, pro reăng a ngiâ hơkâ hlái Ngọc Lũ, pro muâk xâk chêm truâ tung leh mơd^ng, xah hêi. Rơtế tơrŭm ƀă mâu tơdroăng châ tâ ƀă mâu ngế hriâm hngêi trung sih quan luk kuân 1, Khu xiâm pơkuâ lêng, pú Minh, sinh viên hơnăm má mơ’nui dêi Hngêi trung Đăi hok Văn hóa Hà Nội, tối:

‘’Á hlo roh prôk xah hêi kố cho pơxúa, ăm rêm ngế ti tăng plĕng tơ’nôm ‘na tơdroăng mơnhông mơdêk tơnêi têa, ki rơhêng vâ tối cho tung mâu hâi leh môi tiah kố, xua mê mơjiâng mâu tơdroăng xah hêi tiô khôi vâi krâ nah rế vâ pro pâ troh rế mâu pú môi tiah á châ tâ mâu tơdroăng pêi báu lơ rup ká pah tung peăm, vâ pâ xiâm kối pơlê xiâm nah ƀă pakĭng mê ối hlê plĕng tơ’nôm mâu tơmeăm dêi tíu chôu ‘măn tơmeăm khoăng ton nah, ki rơhêng vâ tối cho tơmeăm kơnía git dêi tơnêi têa môi tiah hơkâ hlái Ngọc Lũ’’.

Mâu ngế veăng xah hêi ‘’Rup ká pah tung peăm’’

Tiô jâ Nguyễn Thị Định, Kăn phŏ pơkuâ Ƀơrô hnê hriâm pơlê pơla, Tíu chôu ‘măn tơmeăm khoăng ton nah tơnêi têa, tơrŭm tơbleăng mâu tơmeăm mơnhông mơdêk ƀă mâu tơdroăng châ ta hên hĭn tiô tơdroăng pơxá cho troăng ki pơxúa kum tơmối lăm ngăn thăm hâk vâ ƀă hlê plĕng tơdroăng mơnhông mơdêk dêi hdroâng mơngế:

‘’Mot apoăng khế 3 âm lit mê rơtế ƀă phiu ro dêi tơnêi têa tơmiât troh ‘na hâi tơbâ Hâi pơtáu Hùng hlâ, Tíu chôu ‘măn rak vế tơmeăm khoăng tơnêi têa xuân tơkŭm po mâu hâi prôk xah hêi ai pơxá inâi ‘’Vêh rơxông Hồng Bàng ƀă pói vâ dêi ngin drêng tơkŭm po roh prôk kố cho mâu pú rế lăm ngăn ti tăng plĕng ‘na tơdroăng pơxá, rế châ tâ mâu tơdroăng tơdjâk troh tơdroăng pơxá kố, pói vâ kô pro pâ ăm mâu pú ‘na hnoăng kân kĭn dêi mâu pơtáu Hùng, mâu ngế ai hnoăng mơjiâng ƀă hnê hriâm ăm rơxông kơ’nâi ‘’ôu têa pâ kơnhŏng’’, ‘’kâ plâi pâ ngế ki pêt mơjiâng’’.

Châ mơnúa pro xêh meăn tơmeăm a kơƀăng ki chiâng mơdá

Pakĭng mâu tơdroăng ki xiâm, kuăn pơlê ối châ veăng mâu tơdroăng xah hêi tiô khôi vâi krâ nah môi tiah kơ’nŏng kơxái, tơhrot kơxái, ối tung kơxâk kơ’nŏng, xah pơtroh ăm dêi pó, ôu kâ kuăn; meăn ƀă tơnêi hneăn ƀă kơƀâng ki chiâng tâ tá, pro um chôu, um pôa klá ƀă hía hé, pro tơmeăn vâ tơbâ. Mơnhên mâu  tơdroăng ki châ tơƀrê ki roh prôk xah hêi ‘’Vêh rơxông Hồng Bàng’’, thươ̆ng tă Nguyễn Bá Quốc, Kăn pơkuâ hnê ngăn cheăng Đảng, ngế cheăng kal kí ki má môi tiêuh đoân 1, Hngêi trung sih quan luk kuân 1 tối ăm ‘nâi:

‘’Nhên khât tâng bu ƀă mâu troăng tối ƀă lĭ thuyê̆t lơ ing um mê a hngêi xuân hiăng ‘nâi, ing mâu rơ’jíu, um tơvi lơ mâu kơxop mơ-éa hlá tơbeăng mê ngin xuân kô chiâng ti tăng plĕng laga nhên khât akố rế tâng tơbleăng ƀă mâu um ƀă tơmeăm rế châ hriâm tơdrêng châ tâ tâi tâng mâu tơdroăng ki ai khât mê cho kơnâ hên ‘nâng ƀă mơni kô lôi ăm mâu tơdroăng trâu hơngế tung kăn ƀô̆, mâu lêng dêi hngêi trung’’.

Tơbâ hâi pơtáu Hùng hlâ cho hâi tơbâ kân dêi hdroâng mơngế, cho roh vâ hnê hriâm pơtâng tối ‘’Ôu têa pâ kơnhŏng’’ mơhno hiqâm mơno ‘nâi mơnê trâu hơngế mâu pơtáu Hùng hiăng ai hnoăng mơjiâng tơnêi têa ƀă mâu jâ pôa hiăng tơplâ mơdât lêng kong têa ê rak tơnêi têa. Ing mê rêm ngế đi đo hriâm tâp, pât hiâm mơno, hriâm ăm rơkê vâ kum ăm tơdroăng mơjiâng tơnêi têa, tơxâng ƀă hnoăng kân kĭn dêi rơxông ngoh khên tơnôu hdroâng mơngế, ƀă jâ pôa pin hâi hdrối. Tơdroăng prôk xah hêi ‘’Vêh rơxông Hồng Bàng’’ kô châ tơkŭm po troh tâi hâi lơ 11/4 a Tíu chôu ‘măn tơmeăm khoăng ton nah Tơnêi têa.

Thủy Tiên chêh

A Sa Ly tơplôu ƀă tơbleăng