VOV4.Xơ Đăng - Tơbâ 77 hơnăm hâi mơjiâng Rơ’jíu xiâm Việt Nam, a Tíu xiâm Tơpui mơ’no Rơ’jíu Tơnêi têa 58 Quán Sứ, Hà Nội, Rơ’jíu Việt Nam tơkŭm po rôh mơđah hơdruê xuâng kơpong peăng Kơnhŏng.

Ƀă inâi ôu eăng tơdroăng ki pâ nhuô̆m pơlê xiâm, tơnêi têa, ôu eăng Đảng, Pôa Hồ pâ nhuô̆m, ôu eăng hâi mơjiâng Rơ’jíu Việt Nam, mâu kăn ƀô̆, ngế chêh hlá tơbeăng, ngế rah chêh, kŏng nhân viên chưk, ngế pêi cheăng mâu khu pơkuâ tơdroăng kal, mâu tíu pêi cheăng ki ối tung tơnêi têa ƀă a kong têa ê hiăng djâ troh rôh mơđah hơdruê xuâng mâu ƀai hơdruê xuâng ki hơniâp ro.

Rôh po mơđah hơdruê xuâng kố cho rôh vâ kăn ƀô̆, kong chưk, viên chưk hơ’muăn tối ‘na khôi hmâ ngoh khên tơnôu dêi Rơ’jíu xiâm Việt Nam rơtế prôk ƀă tơnêi têa sap ing Hâi mơjiâng tơnêi têa, ing péa rôh tơplâ, tung pơla hơ’lêh nếo ƀă mơjiâng, rak vế tơnêi têa troh nôkố.

Ƀai hơdruê dêi Ban Thời sự VOV1 ƀă tơdroăng ki hơdruê dêi kăn ƀô̆ ƀă hên hĭn ngế chêh hlá tơbeăng, ngế rah chêh

Veăng tung tơdroăng ki vêh mơhno tối tơdroăng pâ nhuô̆m, hiâm mơno hâk tơngăm tơdroăng cheăng, mơhno tối tơdroăng ki hâk vâ, hnoăng cheăng dêi ngế pêi cheăng ‘na hlá tơbeăng, rak vế ƀă mơdêk khôi hmâ, veăng kum tung tơdroăng mơnhông dêi tơnêi têa.

Rôh po mơđah hơdruê kố xuân cho rôh vâ mâu tíu pêi cheăng Rơ’jíu trâm mâ, hriâm ƀối, hnê tối ăm dêi rơpó mâu tơdroăng ki rơkê, pêi pro tơrŭm krá pơla mâu tíu pêi cheăng, pêi klêi tro hnoăng cheăng kal kí châ pơcháu.

Kong măng lơ 6/9, po Leh diâp pri Nâl tơpui Việt Nam hơnăm 2022. Mâu ƀai hơdruê, xoâng ki rơkê hơniâp a mâu kơpong tung lâp tơnêi têa veăng tung rôh po mơđah, koh tơbâ 77 hơnăm Rơ’jíu Việt Nam.

Katarina Nga tơplôu ƀă tơbleăng