VOV4.Xơ Đăng - Hâi lơ 1/4, Kăn xiâm ngăn Mơhno túa lĕm tro – Tơ’noăng ivá ƀă Ôm hyô Nguyễn Văn Hùng hiăng kĭ pơkâ ăm mơdĭng Katê dêi mơngế Chăm kong pơlê Bình Thuận mot tung inâi tơdroăng ki mơhno túa lĕm tro dêi tơnêi têa. Katê cho môi tơdroăng mơdĭng khôi hmâ kân tung hơnăm dêi hdroâng kuăn ngo Chăm tiô khôp Bà-la-môn, po apoăng khế 7 tiô lit Chăm rêm hơnăm (cho a mơ’nui khế 9 apoăng khế 10 âm lit).

Kố cho mơdĭng tiô khôi hmâ ki hơniâp ro, vâ tơbâ troh mâu xeăng dêi mơngế Chăm ƀă tơbâ troh jâ, pôa. Mơdĭng Katê po tung tíu ki kân rơdâ, pơxiâm sap ing tíu xôi tơbâ klêi mê troh a thôn, pơlê ƀă mơ’nui cho troh a rêm rơpŏng dêi mơngế Chăm. Kuăn pơlê Chăm kong pơlê Bình Thuận ai lối 8.300 rơpŏng rêh ối tơkŭm a 9 to thôn ƀă 4 to ceăm.

Tung mê, lối tơdế mơngế Chăm a kố tiô khôp Bà-la-môn. Mơdĭng Katê hiăng chiâng môi tơdroăng ki kal dêi hdroâng kuăn ngo Chăm a Bình Thuận, veăng kum rak vế, ƀă mơdêk ki kơnía ‘na mơhno túa lĕm tro dêi hdroâng kuăn ngo Chăm. Tơdrêng amê, kố xuân cho rôh vâ mơđah tơbleăng tơdroăng mơhno túa lĕm tro Chăm troh ƀă tơmối tơnêi têa ƀă kong têa ê.

Katarina Nga tơplôu ƀă tơbleăng