VOV4.Xơ Đăng – Ngoh A Ƀlôih, hdroâng mơngế Rơteăng, ối a Ƀuôn Hring, cheăm Ea H’Đing, tơring Čư̆ Mgar, kong pơlê Dak Lak cho ngê̆ nhân ưu tú. Ƀă hiâm mơno hâk git kơ tơdroăng hơdruê, rơngê, ting ting ƀă pôu râng hnoăng cheăng tung rak vế khôi túa, vêa vong dêi hdroâng kuăn ngo, mâu hơnăm hdrối mê hía nah, ngoh hiăng veăng lăm mơđah hên tíu a mâu tíu ki tơ’noăng, hơdruê, rơngê, ting ting, kơhnhon xuâng xua tơring, kong pơlê tơkŭm po.

Tơdrêng ƀă tơdroăng mê, ngê̆ nhân A Ƀlôih ối tí tăng hnê rêi prôa, têng nêng, tŏn không, rơngê ting ting, mơđah tŏn chêng koăng ăm mâu khu rơxông nếo ƀă hnối mơjiâng pro mâu prôa ki pro ing kơlá, phêa, veăng kum rak vế ƀă pơtối mơnhông khôi túa, vêa vong tiô khôi hmâ roh vâi krâ ton nah dêi hdroâng kuăn ngo Rơteăng.

Rêm hdroh ai roh lăm pôu a Ƀuôn Hring, cheăm Ea H’Đing, tơring Čư̆ Mgar, kong pơlê Dak Lak tơpui tơno ƀă vâi krâ-nhŏng o mê hên ngế tung pơlê pơrá ‘nâi nhên troh ngê̆ nhân ưu tú A Ƀlôih. Rêm hơnăm, tung pơlê hmâ po mâu roh tĭng kâ báu nếo lơ mâu roh ki kơvâ ngăn ‘na mơhno túa lĕm tro tơkŭm po hneăng tơ’noăng tŏn chêng, tôu koăng, rêi prôa, têng nêng, rơngê ting ting ƀă hên mâu tơdroăng ki ê mê ngê̆ nhân A Ƀlôih pơrá ai mâ, veăng pêi pro kơhnâ khât ƀă pôu râng dêi hnoăng cheăng tơná.

Ngê̆ nhân ưu tú A Ƀlôih

Luâ 2 hơnăm hdrối, xua pơreăng COVID-19 xông tâ tú tung pơlê pơla, maluâ ôh tá châ tơkŭm mơhriâm hên ngế la ƀă hnoăng pôu râng dêi tơdroăng cheăng, tơdrêng ƀă tơdroăng ki hâk git, pói vâ khât, ngê̆ nhân A Ƀlôih xuân u ối kơhnâ khât tung tơdroăng tí tăng chêh xo, hriâm rơbot mâu tơdrá chêng koăng, mâu tơdrá rơngê, ting ting vâ hnê tối ăm mâu vâi krâ-nhŏng o tung pơlê. Pakĭng mê, ngoh ối cho ngế ki rơkê khât tung mơjiâng pro mâu khu prôa, môi tiah têng nêng, chêng không, klŏng put.

Ngê̆ nhân Ưu tú A Ƀlôih tối ăm ‘nâi:

‘’Hdrối nah, á bu cho ngế ki hmâ lăm mơđah tơdroăng hơdruê, xuâng, tŏn chêng, tôu koăng, ƀă rêi têng nêng, á kô ôh tá chiâng pêi pro ki klâi tâng ôh tá ai khu vâi krâ rơxông hdrối nah, mâu nhŏng o ki hiăng djâ troăng, vâi ki mê kơhnâ tung tơdroăng tŏng kum, hnê tối ăm á. Pơtối rak vế, chôu ‘măn mâu tơdroăng ki mâu vâi krâ rơxông hdrối nah hiăng kơhnâ khât tung tơdroăng tí tăng chêh xo, hnê pơtâp, hnê ’măn ăm pin, mê á kơdo mơ-eăm, khŏm châ chiâng mơhriâm.

Dế nôkố, á dế pơtối chêh bro nâl ki nếo ăm mâu tơdrá rơngê, hơdruê, ting ting, chiếo. Troh hâi kố, á xuân hiăng chiâng pêi pro hên mâu têng nêng, không, klŏng put ƀă hên mâu prôa ki ê’’.

Inâi Ngê̆ nhân Ưu tú A Ƀlôih

Vâ pơtối rak vế ‘na tơdroăng tŏn chêng tôu koăng dêi vâi krâ-nhŏng o Ƀuôn Hring, ngê̆ nhân ưu tú A Ƀlôih hiăng mơdoh hên hơnăm mơhnhôk vâi krâ-nhŏng o tung pơlê ƀă vâi krâ-nhŏng o ing pơlê ki ê rơtế veăng mơhriâm, lăm mơđah. Troh nôkố, ngoh hiăng mơjiâng hên khu tŏn chêng koăng, rơngê ting ting, tung mê ai lối 20 ngế vâi krâ-nhŏng o dêi Ƀuôn Hring. Dế nôkố, ngoh dế ối tí tăng hnê, mơhno tối ăm mâu kuăn cháu tung pơlê ‘na kih thuât tŏn chêng tôu koăng, rơngê ting ting ƀă mâu tơdrá ki rơ-eăng tơniâ, tung mê, ai tá kuăn kơnốu dêi tơná ngoh, inâi cho A Gut.

A Gut tối, dế nôkố ga hiăng rơkê chiâng tŏn mâu prôa, chêng koăng, chêng không, chiâng hơdruê hên ƀai rơngê, ting ting dêi hdroâng Rơteăng.

“Á cho khu rơxông nếo, á kô pơtối hnê mơhno ăm mâu vâi o châ pơtối rak vế ‘na khôi túa, vêa vong dêi pâ pôa hiăng hnê’ măn ăm, ki nhên ga athế rơkê chiâng tŏn, tôu mâu prôa ki pro ing kơlá, phêa dêi hdroâng kuăn ngo tơná. Á chiâng troh dâng lâi á kô hnê tối ăm vâi o tiah mê. Pói rơhêng vâ vâi o hlê plĕng ‘na tơdrá ƀă túa ki tŏn không. La ngiâ kố ah, môi pơla măng tĭng á kô hnê djâ ăm vâi o 1 troh 2 hdroh vâ kum ăm vâi o chiâng tŏn không i rơkê. Khu rơxông nếo ngi kố, ôh tá la lâi kâi piu hiât ‘na khôi túa, vêa vong dêi hdroâng kuăn ngo, pâ pôa hiăng hnê ‘măn ăm’’.

Pôa A Hĕo, 80 hơnăm, cho mơngế krâ ki rơkê tŏn chêng, tôu koăng, xuân cho ngê̆ nhân tung khu tŏn chêng tôu koăng, rơngê ting ting dêi Ƀuôn Hring ai tối tiah kố, Ngê̆ nhân ưu tú A Ƀlôih cho ngế ki rơkê păng ‘nâng ƀă hâk git ƀă khôi túa, vêa vong dêi hdroâng kuăn ngo tơná.

‘’ ‘Na chêng koăng mê á hlo ngê̆ nhân A Ƀlôih cho ngế ki pôu râng hnoăng cheăng, kơhnâ hnê tối, tơdjâ rơhí rơhó ăm vâi krâ-nhŏng o ngin ‘na kih thuât tŏn chêng tơgôu koăng. Ro ‘nâng, dế nôkố ga hiăng hnê mơjiâng dêi kuăn kơnốu mê rơkê tŏn chêng tôu koăng. Pôa A Ƀlôih hnê mơhno, hnê djâ krâu khât kơ ngin ‘na mâu tơdrá tŏn chêng koăng Rơteăng.

Khoh ai tiah mê, kơnôm ga hiăng mơ-eăm tí tăng hriăn plĕng, mơjo pâ khât ƀă hlê plĕng ing hên hơnăm. ‘Na tơdroăng ki tŏn chiêng tôu koăng kơnôm ga hiăng rơkê plĕng mê ngin hmiân tuăn, ngin hiăng châ lăm mơđah hên tíu ing râ cheăm, tơring troh a kong pơlê, thăm nếo ngin ối châ lăm mơđah hên a pơlê kong kơdrâm Plei Ku, Hà Nội ƀă hên mâu tíu ki ê’’.

Ngê̆ nhân ưu tú A Ƀlôih rơtế ƀă kuăn kơnốu A Gut (tŏn không peăng pá hơ-ếo) a Kơbong thâo hơdruê dêi VOV Tây Nguyên

Sap ing hâi ki ‘nâi tŏn chêng tôu koăng, rơngê ting ting troh nôkố hiăng luâ 40 hơnăm, ngoh A Ƀlôih hiăng mơdoh hên chôu phut, ivá cheăng vâ rơtế ƀă vâi krâ-nhŏng o Rơteăng pơtối rak vế, mơnhông mơdêk khôi túa, vêa vong dêi hdroâng kuăn ngo tơná. Maluâ ti mê, pôa ối tô tuăn ó khât ‘na tơdroăng ki rế hía rế vâ hía lôi khôi túa, vêa vong dêi hdroâng kuăn ngo tơná, maluâ ƀă vâi hdrêng, vâi hơnăm ối nếo.

‘’Ki ahdrối tâ, kal athế hnê tối ăm khu rơxông nếo hlê plĕng ki kơnía git ‘na khôi túa, vêa vong dêi hdroâng kuăn ngo, tung mê, ai tá tơdroăng hnê tŏn chêng tôu koăng, rơngê, ting ting. Nếo achê pơla kố, á lăm tí tăng êng mâu vâi rơtăm tung  pơlê, ai mâu vâi o, vâi muăn vâi hâk vâ ‘nâng, pói rơhêng vâ châ hriâm tŏn chêng koăng, rêi prôa, têng nêng, tŏn không. Pakĭng mê, xuân ai mâu vâi rơxông nếo ôh tá kĕn git ƀă mâu chêng koăng, prôa kuăn ngo, ôh tá git tơdroăng rơngê ting ting. Mê cho môi tơdroăng ki á khéa ó khât! Á kô hbrâ đi đo vâ hnê ăm mâu vâi o, vâi muăn vâ vâi ki mê ‘nâi tŏn chêng tôu koăng, ‘nâi rơngê ting ting. Tơná á, tí xê to mơjiâng pro têng nêng, không mê ối mơjiâng pro mâu rơvŏng hlŭm, klông put ƀă hên mâu prôa ki ê’’.

Ƀă tơdroăng ki git khât, hloh hlê, rơkê plĕng, kơhnâ mơ-eăm ƀă mâu hnoăng cheăng dêi tơná, hơnăm 2019, nghê̆ nhân A Ƀlôih hiăng châ Tơnêi têa diâp inâi ‘’Ngê̆ nhân Ưu tú’’ tung kơvâ ‘’Ngê̆ thuât mơđah tơdroăng vâi krâ kuăn ngo’’, mê pôa hiăng chiâng ngê̆ nhân ưu tú ki apoăng dêi hdroâng Rơteăng a Dak Lak. Vâi krâ-nhŏng o tung pơlê hmâ khĕn pôa A Ƀlôih cho mơngế ‘’Rak vế ki kơnía’’ chêng koăng, têng nêng, không, rơngê ting ting dêi mơngế Rơteăng.

Nhat Lisa chêh ƀă tơbleăng