VOV4.Xơ Đăng - Roh tơ’noăng khu lâi thu mê lo Futsal HDBank châ kâ má môi Tơnêi têa 2022 hiăng pơxiâm po a pơlê kong kơdrâm Đà Lạt, Lâm Đồng a hâi kố, lơ 1/6. Tŭm tơdroăng hbrâ ăm hneăng tơ’noăng hiăng châ khu tơkŭm po ƀă mâu kơ koan cheăng dêi kong pơlê Lâm Đồng pêi pro kêi đeăng. Hneăng tơ’noăng Futsal HĐBank châ kâ ối má môi tơnêi têa 2022 ai 11 khu veăng tơ’noăng. Khu tơkŭm po pơtối pêi pro mâu troăng tơ’noăng klâ pro 2 hneăng vâ mơdêk ivá tơbriât, tơdroăng ki pro ăm mơngế rơhêng vâ ngăn ƀă hôm khât dêi mâu roh tơ’noăng.

Hneăng má 1 (roh ki khu lâi thu mê lo) tơkŭm po sap hâi lơ 1/6 troh hâi lơ 9/6, ƀă 5 đô̆i veăng. Mâu đô̆i kố kô tơ’noăng tơvó 1 roh vâ châ điêm, rah ối hdrối kơ’nâi. Tung mê, 4 đô̆i châ kâ ối má môi veăng hneăng má 2 dêi hneăng tơ’noăng. Hneăng má 2 ai 10 đô̆i veăng tơ’noăng tơvó ai 2 roh prôk ƀă roh vêh. Tung mê, roh prôk tơkŭm po sap ing hâi lơ 13/6 troh hâi lơ 4/7 a Tíu xiâm hnê pơtâp ivá ƀă tơ’noăng ivá kong pơlê Lâm Đồng, roh vêh tiô tối hdrối kô tơkŭm po sap hâi lơ 5/11 troh hâi lơ 26/11/2022 a Hngêi tơ’noăng hên tơdroăng a Cần Thơ.

A Sa Ly tơplôu ƀă tơbleăng