VOV4.Xơ Đăng - A hlá mơ-éa kơxô̆ 2704 hâi lơ 28/4/2022, pôa Vũ Đức Đam, Ngế pro xiâm phŏ hnê ngăn tơnêi têa môi tuăn ƀă tơdroăng ki tơkŭm po 1 tíu pĕng mlŏi reăng pơtôu (chhâk hngế ƀă ‘nâng ‘nâi), tung pơla ôh tá luâ 15 phut a Leh pơxiâm po Hneăng hôp Tơ’noăng ivá Đông Nam Á rôh má 31 Việt Nam (SEA Games 31) a kong măng hâi lơ 12/5/2022 a Plông kơtu ƀa long Tơnêi têa Mỹ Đình, pơlê kong kân Hà Nội.

Ngế pro xiâm phŏ hnê ngăn tơnêi têa pơcháu ăm Vi ƀan hnê ngăn pơlê kong kân Hà Nội pơkâ thế tơdroăng ki tơkŭm pêi pro, tung mê tơrŭm krá ƀă Khu xiâm ngăn Mơhno túa lĕm tro, tơ’noăng ivá ƀă ôm hyô ƀă mâu kơ koan ki ai tơdjâk troh tung pơla hbrâ rơnáu, tơbleăng; rak vế tơniăn pêi pro tro tơdroăng pơkâ dêi Chin phuh ‘na rak ngăn, pĕng mlŏi ƀă gak kring tơniăn, athế tơniăn; pêi pro hbrâ mơdât pơreăng COVID-19 tro tiô pơkâ.