Kơmăng lơ 27/11, pôa Vũ Đức Đam, Ngế pro xiâm phŏ hnê ngăn tơnêi têa hiăng veăng leh pơxiâm po Hâi leh xah hêi mơhno Khôi túa lĕm – Ôm hyô Bạc Liêu ƀă leh  Dạ cổ hoài lang hơnăm 2022. Hâi leh xah hêi dó inâi “Bạc Liêu tơdjêp ki lĕm reăng tơmeăm kơnía ƀă tơdroăng pói vâ mơnhông mơdêk’’ mê cho 14 tơdroăng pêi, veăng amê ai veăng dêi 25 kong pơlê, pơlê kong kơdrâm tung lâp tơnêi têa.

Ki má môi dêi Hâi leh cho tơdroăng tơrŭm krá tơniăn pơla khôi túa lĕm ƀă ôm hyô; rế nhuô̆m ki kơnâ pơlê Dạ cổ hoài lang dêi nhak sih Cao Văn Lầu chêh pro kơtăn kố lối 100 hơnăm, rế rak vế ƀă troh lâp lu Ngê̆ thuât Đờn ca tài tử Peăng Hdroh tơnêi têa hiăng châ UNESCO pơ-ôu pơ-eăng cho tơmeăm mơhno khôi túa lĕm tro ki ôh tá hlo ƀă mâ dêi kuăn mơngế.

Xông tơpui a leh pơxiâm po Hâi leh, pôa Vũ Đức Đam, Ngế pro xiâm phŏ hnê ngăn tơnêi têa tối: Hâi leh xah hêi mơhno khôi túa lĕm tro – ôm hyô Bạc Liêu ƀă leh xah hêi Dạ cổ hoài lang hơnăm 2022 cho tơdroăng ki tơxâng a ngiâ pêi pro Mơgêi dêi pôa Nguyễn Phú Trọng, Kăn xiâm pơkuâ hnê ngăn Đảng a Hneăng hôp mơhno Khôi túa lĕm tro lâp tơnêi têa tơkŭm po kơtăn kố châ 1 hơnăm, tơmiât troh pơkâ rak vế ƀă mơnhông lĕm tâ ki kơnâ mâu tơmeăm kơnía mơhno khôi túa lĕm, mơjiâng tơdroăng mơhno khôi túa rơkê, pêng păm khôi túa hdroâng kuăn ngo.