VOV4.Xơ Đăng - Kơmăng lơ 29/3, a cheăm Ka Đơn, tơring Đơn Dương, Lâm Đồng hiăng tơkŭm po leh pơxiâm po Hâi phiu ro Mơhno khôi túa lĕm tro, Tơ’noăng ivá kơpong vâi krâ hdroâng kuăn ngo kong pơlê Lâm Đồng roh má 5 – 2022. Ƀă dó inâi ‘’Ki chuât xơtó troh lâp lu kơpong tơnêi kân rơdâ’’, Hâi phiu ro Mơhno khôi túa lĕm tro, Tơ’noăng ivá kơpong hdroâng kuăn ngo kong pơlê Lâm Đồng roh má 5 – 2022 mơhnhôk 300 ngế ngê̆ nhân lo ing 12 tơring, pơlê kong kơdrâm tung kong pơlê veăng.

Pơtâng tối ‘na hâi phiu ro a mâu troăng kơpho#, pơlê kân

Tung pơla 2 hâi po, hâi phiu ro hiăng tơkŭm po hên tơdroăng vâ pơtâng tối rak vế, mơnhông ki kơnâ tơmeăm khoăng mơhno khôi túa lĕm tro chêng koăng Tây Nguyên; tơ’noăng pêi pro ƀlêi trâng Pơkâ Hneăng hôp Kăn teăng mâ lâp tơnêi têa roh má XIII dêi Đảng. Ki rơhêng vâ tối, leh pơxiâm po ƀă kơmăng phiu ro rŭm môi tuăn ‘’Ki chuât xơtó troh lâp lu kơpong tơnêi kân rơdâ’’, hên tơdroăng mơđah tơbleăng a tíu mơđah, vêh pro tơdroăng tơdah xeăng On, xeăng chêng koăng, tĭng xối xeăng long rơchôa têa dêi mơngế Chu ru; pế pơchên kơchâi kâ ƀă tŏn chêng tơgôu koăng, hơdruê xuâng, xah hêi trâm mâ dêi mâu ngế ngê̆ nhân mơngế Mạ, K’ho ƀă hía hé.

Mâu khu ngê̆ nhân veăng mơđah tơbleăng mâu tơmeăm ếo pơtâk dêi hdroâng kuăn ngo tơná

Pakĭng mê, hâi phiu ro ối tơkŭm po mâu hneăng tơ’noăng ‘na ivá, mâu tơdroăng xah hêi tiô khôi vâi krâ nah, hneăng tơ’noăng tŏn chêng tơgôu koăng ƀă hơdruê xoâng ƀă hía hé.

A Sa Ly tơplôu ƀă tơbleăng