VOV4.Xơ Đăng - Kơxê lơ 18/9, a plông tơ’noăng Plei Ku tơkŭm po leh pơxiâm po Hneăng tơ’noăng ivá kong pơlê Gia Lai roh má IX hơnăm 2022. Hneăng tơ’noăng ivá kong pơlê Gia Lai roh kố veăng amê ai 20 khu tơ’noăng dêi 17 tơring, pơlê kong krâm, pơlê kong kơdrâm ƀă 3 kơvâ cheăng: Kŏng an, Hnê hriâm – Hnê mơjiâng tuăn ngôa rơkê, Khu lêng ƀă lối 1.800 ngế tơ’noăng. Mâu ngế tơ’noăng kô tơbriât xo 197 mê dái a 19 môn tơ’noăng: kơtú ƀa long, peăng ƀa long, tơhrot kơxái, klê têa, pĕng mơnĕng, trŭt loăng, peăng xâk í, karate, tawondo, vovinam ƀă hía hé.

Pơxiâm po Hneăng tơ’noăng ivá kong pơlê Gia Lai roh má IX hơnăm 2022

Tâng pơchông hneăng tơ’noăng ivá lâp kong pơlê roh má VIII, hneăng tơ’noăng kố ai tơ’nôm môn klê têa. Ahdrối leh pơxiâm po, sap hâi lơ 9/8, Hneăng tơ’noăng ivá kong pơlê roh má IX, hiăng tơkŭm po hên tơdroăng tơ’noăng. Riân troh kơxê lơ 18/9, khu tơ’noăng pơlê kong kơdrâm Plei Ku dế ối má môi, tơring Ia Grai ối má péa ƀă 24 mê dái mêa, tơring Đức Cơ ối má pái. Hneăng tơ’noăng kô mơgêi a hâi lơ 23/9.

A Sa Ly tơplôu ƀă tơbleăng