VO4.Xơ Đăng - Kơxo lơ 14/6, a plông tơ’noăng ivá kong pơlê Kon Tum a pơlê kong kơdrâm Kon Tum hiăng tơkŭm po Leh pơxiâm po Hneăng tơ’noăng ivá kong pơlê Kon Tum roh má VII hơnăm 2022. Tơkŭm po tung pơla 7 hâi, sap ing kố troh tâi hâi lơ 20/6, Hneăng tơ’noăng ivá kong pơlê Kon Tum roh má VII hơnăm 2022 ai 30 khu ƀă 2.600 ngế kăn ƀô̆, mâu ngế ki hnê ƀă mơngế ki veăng tơ’noăng. A hneăng tơ’noăng mâu ngế tơ’noăng 18 môn tơ’noăng tơbriêt 136 khu mê dái.Ahdrối pơxiâm hneăng tơ’noăng hiăng ai 10 môn châ tơkŭm po tơ’noăng hdrối, mê cho: peăng pĭng pŏng, peăng xâk í, cơ vua, cơ tươ̆ng, klê têa, kơtâu, kơtú ƀalong mơngế kơnốu, karate, teakwondo ƀă yoga.

Ting tông um Pôa Hồ a Leh pơxiâm po Hneăng hôp tơ’noăng ivá kong pơlê Kon Tum roh má VII hơnăm 2022

Pôa Nguyễn Xuân Truyền, Kăn phŏ pơkuâ ‘na mơhno túa lĕm tro, Tơ’noăng ivá ƀă Ôm hyô, Kăn phŏ tơkŭm po Hneăng tơ’noăng ivá kong pơlê Kon Tum roh má VII hơnăm 2022 tối ăm ‘nâi, tâng pơchông ƀă roh tơkŭm po hdrối, Hneăng tơ’noăng roh kố ai tâk hên ‘na kơxô̆ môn tơ’noăng ƀă kơxô̆ mơngế veăng tơ’noăng.

A Sa Ly tơplôu ƀă tơbleăng