VOV4.Xơ Đăng - Kơxo lơ 10/2, a Tíu chôu ‘măn tơmeăm ton nah – Tíu chôu ‘măn kơxop mơ-éa kong pơlê Kon Tum, Khu chêh hlá tơbeăng kong pơlê Kon Tum tơkŭm po leh pơxiâm po Hneăng hôp khu chêh hlá tơbeăng Hơngui Nhâm Dần’’. Xông tơpui a leh pơxiâm po, pôa Nguyễn Hữu Tháp, Kăn phŏ hnê ngăn Vi ƀan kong pơlê Kon Tum mơnhên Hôp khu chêh hlá tơbeăng Hơngui Nhâm Dần kong pơlê Kon Tum hơnăm 2022 cho hâi hôp dêi mâu ngế chêh hlá tơbeăng; Kum mơđah tơbleăng tơmeăm hlá tơbeăng troh ƀă kuăn pơlê.

Mâu ngế pơchuât hlá tơbeăng a Hôp khu chêh hlá tơbeăng Hơngui Nhâm Dần kong pơlê Kon Tum 2022

Mơhnhôk tơdroăng pêi cheăng kơhnâ, tơmiât pêi rơkê dêi khu ngế chêh hlá tơbeăng tơxâng tiô tơdroăng kal vâ tơdroăng kal rế hía rế hên dêi mâu ngế ki pơchuât, mâu ngế tơmâng. A hneăng hôp khu chêh hlá tơbeăng Hơngui Nhâm Dần kong pơlê Kon Tum 2022 ối tơkŭm po hên tơdroăng môi tiah: Châ kâ mâu kơchâi kâ dêi mơngế Bơhnéa, Jêh - Triêng; Tíu mơđah tơbleăng um nghê̆ thuât Tơnêi ƀă Mơngế Kon Tum; Tơbleăng mâu tơmeăm OCOP dêi kong pơlê ƀă 5 tíu chôu ‘măn tơmeăm, ƀă hía hé.

Tơbleăng khôi túa lĕm tro tơmeăm kơchâi kâ dêi vâi krâ a Hôp khu chêh hlá tơbeăng Hơngui Nhâm Dần kong pơlê Kon Tum hơnăm 2022

Tơkŭm po sap hâi lơ 10 – 13/2, Hôp tơbleăng rơnó Hơngui Nhâm Dần kong pơlê Kon Tum hơnăm 2022 cho roh vâ mơngế chêh hlá tơbeăng pêi cheăng a mâu kơ koan chêh hlá tơbleăng trâm mâ, hnê dêi pó túa ki rơkê tơtro, ing mê ‘nâi tơ’nôm tơdroăng chêh, tơdroăng cheăng ‘na chêh hlá tơbeăng. Kố cho roh vâ kong pơlê Kon Tum tơbleăng mâu khôi túa lĕm tro ki má môi troh kuăn pơlê, tơmối tung kong pơlê ƀă kong pơlê ki ê.

A Sa Ly tơplôu ƀă tơbleăng