VOV4.Xơ Đăng -  Hâi lơ 19/5, a pơlê kong kơdrâm Ƀuôn Ma Thuột, Khu Nhạc sĩ Việt Nam tơrŭm ƀă kong pơlê Dak Lak tơkŭm po hơdruê, xuâng lâp tơnêi têa rôh má 1 hơnăm 2022 ƀă tơdroăng ki veăng dêi khu hơdruê, xuâng dêi văn nghệ sĩ lo ing 20 to kong pơlê, pơlê kong kân tung lâp tơnêi têa.

Po sap ing nôkố troh tâi hâi lơ 20 la ngiâ, po hơdruê, xuâng lâp tơnêi têa rôh kố ai 52 ƀai hơdruê, xuâng ối tung mâu ƀai hơdruê, tôu, rêi mâu tơdrá. Tơdroăng ki kal dêi rôh po hơdruê xuâng kố cho ôu eăng Đảng, Pôa Hồ, Tơnêi têa ƀă inâi têa kơxĭ, chuăn rơlố Việt Nam; mâu tơdroăng ki hiăng pêi pro klêi, tơdroăng tơ’noăng mơjiâng thôn pơlê nếo a tơnêi têa nôkố.

Po hơdruê, xuâng lâp tơnêi têa rôh má 1 hơnăm 2022 châ tơkŭm po a Dak Lak

Malối cho hên ƀai hơdruê, xuâng tiô tơdrá ton nah mâu kơpong, malối cho tơdroăng hơdruê xuâng chal vâi krâ Tây Nguyên. Rôh po hơdruê, xuâng kố cho hâi mơdĭng dêi mâu khu nhạc sih ƀă kuăn pơlê ki hâk vâ ‘na tơdroăng ki hơdruê xuâng vâ khĕn kơdeăn, mơđah tơbleăng mâu ƀai hơdruê, xuâng, mâu tơdroăng ‘na hơdruê xuâng nếo, pơtối mơhnhôk tơdroăng ki tí tăng tơdroăng ki rơkê tung mâu kơvâ cheăng: chêh, mơđah ƀă hnê ‘na hơdruê, xuâng.

Xuân cho rôh vâ trâm mâ tơpui tơno pơla mâu nhạc sĩ ki chêh ƀai hơdruê, mâu ngê̆ sih ki mơđah pêi pro tiô tơdroăng ki rơhêng vâ hmâng, vâ ngăn rế hía rế hên dêi kuăn pơlê.

Katarina Nga tơplôu ƀă tơbleăng