VOV4.XơĐăng - Kong măng lơ 11/1, a pơlê kong kơdrâm Ƀuôn Ma Thuột, Khu ngăn Pơtâp ivá, Khu kơtu ƀa long Việt Nam tơrŭm ƀă Vi ƀan hnê ngăn kong pơlê Dak Lak tơkŭm po rôh pơxiâm po Rôh tơ’noăng mâu Kâu lăk ƀô̆ Peăng pĭng pŏng Tơnêi têa hơnăm 2021. Rôh tơ’noăng kố po sap ing hâi lơ 11/1/2022 troh tâi hâi lơ 15/1/2022. Rôh tơ’noăng hơnăm kố tơkŭm 152 ngế tơ’noăng dêi 22 to kâu lăk ƀô̆ peăng pĭng ppŏng a 10 to kong pơlê, pơlê kong kân ai tơdroăng ki tơ’noăng peăng pĭng pŏng mơnhông rơdêi môi tiah: Hà Nội, pơlê kong kân Hồ Chí Minh, Đà Nẵng, mâu kong pơlê Hải Dương, Hải Phòng, Khánh Hòa, Lâm Đồng, Nghệ An, Bình Dương ƀă tíu ki châ tơkŭm po tơ’noăng cho Dak Lak. 

Pơxiâm po rôh tơ’noăng Peăng pĭng pŏng mâu kâu lăk ƀô̆ Tơnêi têa 2021 a Dak Lak

Mâu ngế ki tơ’noăng kô tơ’noăng a 14 khu Me dai a mâu tơdroăng tơ’noăng môi tiah: Khu tơ’noăng kơnốu, khu tơ’noăng kơdrâi, péa ngế kơnốu, péa ngế kơdrâi, môi ngế kơnốu, môi ngế kơdrâi. Tiô khu tơkŭm po, kố cho rôh tơ’noăng ối tung tơdroăng ki tơ’noăng peăng ƀâ long tơnêi têa, ing rôh tơ’noăng, Khu xiâm tơrŭm Peăng pĭng pŏng Việt Nam kô rah xo mâu ngế ki tơ’noăng rơkê vâ pơtối hnê, ‘mot tơ’nôm tung mâu rôh tơ’noăng dêi khu tơ’noăng Peăng ƀâ long Tơnêi têa.

Katarina Nga tơplôu ƀă tơbleăng