Tung tơdroăng kal koh phiu ro 110 hơnăm mơjiâng kong pơlê Kon Tum, kơxê lơ 8/2, Vi ƀan pơlê kong kơdrâm Kon Tum tơbleăng vâ chê 150 kơchâi kâ, ki hên cho mâu kơchâi kâ tiô khôi vâi krâ nah ki kơhiâm má môi dêi pơlê xiâm Kon Tum. Tơdroăng kố hiăng mơjiâng tơdroăng ki phá tơ-ê pro mơhnhôk kuăn pơlê ƀă tơmối troh ngăn.

Rơtế ƀă tíu mơđah tơbleăng kơchâi kâ dêi 21 to cheăm, bêng ối tung pơlê kong kơdrâm Kon Tum, tung tíu mơđah tơbleăng khôi túa lĕm tro kơchâi kâ a troang kân Trần Cao Vân ối ai mâu tíu mơđah tơbleăng tơmeăm dêi 3 tơring : Kon Rẫy, Kon Plông ƀă Đăk Glei veăng.

Ki pro mơnâ mâ ngăn má môi cho mâu kơchâi kâ xú lĕm dêi ngo ngối kong kế, môi tiah: tơxông prông, í pôh, ká têa plông, drôu sâm, kơchâi chôu, kơchâi kong ƀă hiá hé.

Tơdroăng ki ro kơhiâm cho mâu kế, kơchâi kâ tơngah xêh kŭn, môi tiah tơxông prăng, kơƀăn trang luô̆m, kơchâi goih rơvât, hjuô krí ‘nhíu ƀă hiá hé xuân châ tơbleăng vâ kuăn pơlê ƀă tơmối ngăn ƀă mơnúa kâ. Ƀă tơkŭm po kân má môi sap ing hdrối nah troh nôkố, a tơdroăng kal tơbleăng khôi túa lĕm tro ‘na kơchâi kâ xua Vi ƀan pơlê kong kơdrâm Kon Tum tơkŭm po hiăng ai dâng 1.400 kăn teăng mâ, kuăn pơlê, tơmối châ kâ mâu kơchâi kâ ƀă ôu drôu sâm.

Veăng pế pơchên, tơbleăng ‘na khôi túa lĕm tro kơchâi kâ kơhiâm a tơdroăng kal ai lối 120 ngê̆ nhân ƀă mâu ngế ki rơkê pế pơchân kơchâi kâ má môi.