VOV4.Xơ Đăng - Pakĭng mâu tơdroăng ki vâ tơklâ hơnăm ton, tơdah hơnăm nếo, Têt Lo hơnăm nếo cho roh mơngế Việt Nam mơhno tối hiâm tuăn mơno ƀă plêng tơnêi, mâu khu xeăng ƀă hiâm mơno ki ai tuăn hiâm mơjo pâ kơ nôu pâ, jâ pôa, mâu ngế ki hiăng hlâ. Têt ối vâ mơhno tối, cho roh ki tơkŭm rêm ngế tung rơpŏng hngêi, mâu vâi kuăn hriâm tâp, pêi cheăng hơngế prếo vêh dêi a pơlê, rơtế tơkŭm kâ hmê tung chôu phut koh tơdah hơnăm nếo. Maluâ nôkố, hên rơpŏng hiăng tah lôi mâu khôi túa, pơtê lôi tơdroăng rơkâu xối laga, ki kơnía dêi khôi túa, vêa vong kố xuân ối tung tơrêm rơpŏng hngêi, cho ki xiâm dêi hiâm tuăn ‘na mâu hâi lo hơnăm nếo, ôh tá ai ki klâi chiâng hơ’lêh teăng amê.

Hâi kố, tung tĭng xối pleăng Xeăng Kơnoh Onvêh a plêng (a hâi lơ 23 khế môi âm lĭt), mâu rơpŏng mơgrúa hngêi hơpiâp krúa lĕm ƀă pói vâ Xeăng Kơnoh On kô tơbleăng mâu tơdroăng ki lĕm ƀă Kăn Xeăng ƀă châ tơniăn lĕm tung hơnăm nếo. Tơdroăng kố ối mơhno tơdroăng ki kơnâ tơniăn tung hbrâ tơpâ mơdât on chếo, djâ kuăn mơngế pêi mâu tơdroăng ki lĕm, tơdroăng ki lĕm tro tung hơnăm nếo.

Rơtế ƀă tĭng xối pleăng Xeăng Kơnoh Onkhôi túa lĕm pôu tơnâp jâ pôa, khôi túa pleăng plâi pôm tung kơƀâng xối pleăng jâ pôa, tơkŭm po xối jâ pôa, xôi pleăng tơnêi tơníu hiăng mơjiâng khôi túa lĕm hâi Têt dêi mơngế Việt Nam tối tơdjuôm, mơjiâng tơdroăng ki lĕm tung rêm rơpŏng tối krê.

Châ hlo mâu khôi túa lĕm tro, tĭng xối pleăng dêi rơpŏng tung rêm roh Têt, Ngô Minh Kiên, sinh viên hơnăm má môi Học viện Ngoại giao tối:

‘’Tiô khôi túa vâi krâ nah rơpŏng á mê pôa peăng nôu cho ngế ki krâu má môi ƀă nhên má môi ‘na khôi túa xối pleăng chôu nhang môi tiah lâi. Tơdroăng tơná á hriâm hên tơdroăng kố xuân cho môi tơdroăng ki á tơmiât ki kơnía. Tung tơdroăng rêh ối nôkố, ai mâu ngế kô ti tăng mâu tơdroăng ki kơnâ ton nah, mơngế lăm ti tăng mâu tơdroăng ki kơnâ nếo tâ, môi tiah á mê vâ ti tăng mâu tơdroăng ki kơnâ ton nah, kố cho môi tơdroăng pêi pro ki kơniá’’.

A mâu hâi Têt, mâu ngế tung rơpŏng hngêi mơhé lăm alâi, pêi ki klâi xuân vêh tơkŭm ƀă dêi pó, kâ hmê tŭm nhŏng tung hngêi, rơtế lăm pôu kơ-êng nhŏng o hdroâng hdrê, diâp ăm jâ pôa, nôu pâ liăn ngân, lăm khôp apoăng hơnăm vâ pâ trâm tơdroăng mơhúa, rơkâu dêi pó mâu tơdroăng ki lĕm tung hơnăm nếo ƀă hía hé.

Lê Giang, sinh viên hngêi trung Đăi hok Sư phăm Hà Nội tối, tơdroăng tơkŭm dêi pó rơtế jâ pôa, nôu pâ ƀă nhŏng o đi đo cho kơjo má môi tung roh Têt Lo hơnăm nếo:

‘’Á tơmiât mâu ki lâi ối tung tơdroăng ki kơnâ mê gá xuân cho mâu tơdroăng ki kơnâ xua mê thế rak vế. Mơni pin ôh tá chiâng rak 100% tiah mê. Laga mâu tơdroăng ki ối tung tơdroăng xối pleăng jâ pôa, môi tiah tơdroăng kơmăng 30, hâi má môi, hâi má péa, hâi má pái mê tiô á tơmiât mâu tơdroăng ki lâi chiâng pêi mê pêi pro hdrối thế kơjo má môi. Têt cho roh vâ rơpŏng tơkŭm rơtế dêi pó rơtâ tá kơƀăng kâ hmê ƀă djâ pôa pin nah ƀă hâi má pŭn, hâi má pơtăm tâng ai liăn pin kô chiâng lăm ôm hyô’’’.

Pakĭng mê, mơngế Việt Nam ối ai khôi tuá kơxuô kơƀăn tơxông, kơƀăn ték, pleăng reăng, krí xo tơdroăng ki pon mơhúa, djâ tơdroăng ki lĕm tung hâi Têt, ƀă tơdroăng pói vâ ‘na môi hơnăm nếo tơniăn lĕm, hơniâp ro. Mơhé a pơlê xiâm pâ, tơnêi jâ pôa nah, lơ rêh ối hơngế pơlê xiâm, Tơnêi têa, mơngế Việt Nam đi đo rak mâu khôi túa ki lĕm to lâi rơxông kố.

Tiô phŏ yăo sư, tiê̆n sih Nguyễn Văn Huy, Kăn pơkuâ Tíu chôu ‘măn, rak vế tơmeăm khoăng ton nah hdroâng mơngế Việt Nam, mơhé nôkố mâu khôi túa tung roh Têt ai hên pơ’lêh laga Têt Lo hơnăm nếo xuân ối rak mơhúa ki krê, xuân cho hâi leh ki kal má môi, hơtôu má môi dêi tâi tâng hdroâng mơngế:

‘’Tiô á tơmiât, tơkâ hluâ hâi khế, tơkâ hluâ tơdroăng ki pơ’lêh ‘na cheăng kâ – rêh ối pơlê pơla, Têt dêi pin hiăng pơ’lêh hên laga ki kal má môi, cho mâu tơdroăng ki kơnâ dêi Têt xuân ối rak, pơtih troh hâi lơ 23 khế môi âm lĭt pin thế chôu nhâng hâi Xeăng Kơnoh Onto a plêng, cho kơmăng lo hơnăm nếo tâi tâng rêm ngế tơkŭm dêi pó, klêi mê đi đo pâ troh jâ pôa nah, mâu ngế ki hiăng mơjiâng chiâng pin nôkố’’.

Tung tơdroăng ki pơ’lêh đi đo dêi pơlê pơla pêi cheăng xúa kơmăi kơmok, dêi tơdroăng rêh ối kơdrâm kơdrĕng mơngế, mâu khôi túa lĕm tro iâ hên xuân pơ’lêh ăm tơtro tơdroăng rêh ối laga Têt tiô khôi vâi krâ nah xuân cho tơdroăng ki má môi tung tơdroăng rêh ối mơhno túa lĕm tro dêi mơngế Việt Nam, xuân ối rêh tiô hâi khế.

VOV1 chêh

A Sa Ly tơplôu ƀă tơbleăng