Plâ to lâi khế hdrối mê hía nah, a tơrêm kơxo, hngêi ki hôp tơdjuôm pơlê pơla a ƀuôn Kmrơng Prŏng B, cheăm Ea Tu, pơlê kong kơdrâm Ƀuôn Ma Thuột, kong pơlê Dak Lak hiăng vêh tâng nếo idrâp chêng koăng dri drih dri drih rơtế ƀă idrâp tơpui, tó dêi vâi o, vâi muăn. Vâ chê 30 ngế vâi rơtăm, vâi o kơnốu phô̆m vâ xông kân hơniâp ro drêng châ mâu vâi krâ hnê tôu chêng tôu koăng, ing tơdroăng ki kal vâ ‘nâi ahdrối ‘na khôi túa, troh a túa ki tôu chêng hlái, chêng kơlá lơ pơtâp tôu chiâng môi ƀai ki tŭm têk. O Y Thiên Niê ai tối tiah kố:

“Apoăng xiâm mot hriâm nah, á tá hâi ‘nâi, ôh tá chiâng tôu, la kơnôm châ thái hnê hên tơdroăng, ‘mâi rơnêu ăm ngin mê nôkố ngin hiăng rơkê tôu chêng. Lâm ki ki ngin hriâm kố hơniâp ro khât xua thái hnê ăm ngin tơrêm tơdroăng rơhí rơhó’’.

Tiô pôa Y Wih Êban-Kăn pơkuâ hnê ngăn Chi ƀô̆ ƀuôn Kmrơng Prŏng B tối, lâm hnê tôu chêng koăng cho tơdroăng ki hiăng pói vâ dêi hên ngế. Klêi kơ’nâi hên xôh lăm troh a tơrêm rơpŏng hngêi mơhnhôk nôu pâ vâi muăn ăm kuăn ‘nĕng lăm hriâm tôu chêng, rơnó pơtê hriâm a hngêi trung hơnăm kố, lâm hnê tôu chêng koăng hiăng tơ’mot hên vâi rơtăm, vâi o phô̆m xông kân veăng hriâm.

‘’Drêng po lâm ki kố kăn ƀô̆ dêi pơlê xuân hơniâp ro, hlo mâu vâi muăn kơhnâ, vâ khât, hên mâu vâi muăn ôh tá ai inâi tung inâi hriâm la vâi hiăng  mơhnŏng troh lăm hriâm xêh. Nốkố, hlo vâi muăn hriâm hiăng chía rơkê. Xua mê, kơdo mơ-eăm pơtối rak lâm ki hnê kố, ôh ta xê to hơnăm kố, mê hơnăm ah, tâng xuân ối pơtối rak tiah kố, pin pơtối tơrŭm cheăng ăm i tơniăn, i hlâu ƀă tro tâ’’.

Rơnó pơtê hriâm a hngêi trung hơnăm kố, rơtế ƀă lâm ki hnê tôu chêng koăng a ƀuôn Kmrơng Prŏng B, cheăm Ea Tu, ối po môi to lâm môi tiah mê tơkuăm po a ƀuôn Kŏ Siêr, bêng Tân Lập, pơlê kong kơdrâm Ƀuôn Ma Thuột. Kố cho lâm xua Tíu xiâm ngăn ‘na rơ’jíu, túa lĕm tro ƀă tơ’noăng ivá pơlê kong kơdrâm Ƀuôn Ma Thuột tơkŭm po tiô tơdroăng pơkâ ki pơtối rak vế, mơnhông khôi túa, vêa vong túa lĕm tro mâu hdroâng kuăn ngo ki iâ mơngế pơlê kong kơdrâm Ƀuôn Ma Thuột hneăng hơnăm 2022-2025, pơkâ troh a hơnăm 2030.

Jâ Phạm Thị Hải Bình-Kăn phŏ pơkuâ ngăn Tíu xiâm tối ăm ‘nâi, rơtế ƀă tơdroăng hnê tôu chêng koăng, khu kố ối po 2 to lâm hnê kơhnhon xuăng ƀă hnê vâi o kơdrâi a 6 to pơlê, ối tung pơlê kong kơdrâm Ƀuôn Ma Thuột. Mâu lâm hnê tôu chêng koăng ƀă kơhnhon xuăng po mô mơne ing hơnăm 2019 troh nôkố, hiăng tơ’mot lối hrĭng ngế vâi rơtăm, vâi o phô̆m xông kân veăng hriâm, ing mê, pơtối mơdêk khôi túa ƀă tơrak vế vâ khu hơnăm ối nếo hdroâng kuăn ngo thăm mơjo hâk dêi khôi túa, tơlá kuăn ngo tơná.

‘’Drêng lo lăm mơhnhôk mâu vâi o hơnăm kố lăm hriâm ôh tá pá môi tiah mâu hơnăm hdrối mê hía nah, kơxô̆ mâu vâi o chêh inâi hriâm hơnăm kố chía kơdrâm. Ngin mơnhên ngăn tiô tơdroăng ki pơkâ a mâu bêng, cheăm ta hâi po lâm tôu chêng koăng ƀă lâm kơhnhon xuăng lơ mâu lâm ki hiăng hnê hriâm, la pơtối vâ mơhriâm luâ tâ kơ mê nếo, ing mê, kô pơtối po lâm ki hnê hên tơdroăng tâ, ing mê ah gum pro ăm mâu vâi rơtăm, vâi o phô̆m vâ xông kân hâk mơnhăng ƀă tơdroăng hriâm tôu chêng tôu koăng’’.

Hiăng hmâ ƀă tơdroănug hnê tôu chêng koăng tung plâ hên hơnăm hiăng luâ, pôa Y Hiu Niê Kdăm, cho ngê̆ nhân ưu tŭ, ối ƀuôn Mduk, bêng Ea Tam, pơlê kong kơdrâm Ƀuôn Ma Thuột, ai tối, tơdroăng ki pôa dế tô tuăn nôkố, pro ti lâi tơdroăng ki hnê mê rĕng tơ’lêi hlê, tơ’lêi chôu, vâ vâi rơtăm, vâi o phô̆m xông kân rĕng chiâng tôu chêng koăng. Vâ la ngiâ, hmâ vâ lăm u ti lâi mê mâu vâi muăn xuân hlê plĕng ‘na chêng koăng xuân vâ veăng mot tung khu tôu chêng koăng ki lĕm tro má môi.

‘’Pơtối vêh hnê tơdroăng ki á hiăng plĕng ‘na mâu tơdroăng ki kal dêi chêng koăng, ta mâu tơdroăng ki hiăng monhông luâ tâ kơ mê, tâi tâng lâm ki hnê ăm vâi o kơnốu, ta vâi o kơdrâi a rêm xôh pơtê hriâm chư a hngêi trung á hlo ga ai pơxúa khât, châ pêi pro tro mâu tơdroăng ki xiâm tung pơtối rak vế ngăn khoi túa lĕm tro dêi hdroâng kuăn ngo Rơđế. Vâi krâ-nhŏng o a pơlê amê châ hlo tơdroăng ki kal, ki ‘ló hâk tơngăm dêi khôi túa, vêa vong lĕm tro dêi hdroâng kuăn ngo tơná, pơtối vêh mơnhông mâu túa ki xah hêi, vâi kô chôu vế xiâm kối, mâu tơdroăng ki kơnía git dêi hdroâng kuăn ngo xua pâ pôa hiăng chôu ‘măn ăm’’.

Ƀă mâu vâi rơtăm, vâi o phô̆m vâ xông kân ki châ hriâm tôu chêng, rêm xôh to a lâm cho mâu chôu phut ki hơniâp ro, xua mâu vâi o châ tí tăng hlê plĕng nhên ‘na khôi túa, vêa vong dêi pâ pôa tơná, châ tâng, châ hriâm, ƀă chiâng tôu chêng koăng ki kơnía dêi hdroâng kuăn ngo tơná. Mâu ƀai hriâm ki mê ôh ta xê to gum mâu vâi o ai tơ’nôm tơdroăng ki pơxúa tung hâi pơtê hriâm chư a hngêi trung mê ối veăng gum mâu vâi o châ pêi pro tơdroăng ki ai pơxúa tung rơnó pơtê hriâm chư, ối châ tơbâ vế dêi mâu tơdroăng ki kơnía lĕm tro vâ mâu vâi o pơtối châ rak vế khôi túa, vêa vong dêi kuăn ngo tơná.