VOV4.Xơ Đăng - Khu ngăn Mơhno túa lĕm tro, Tơ’noăng ivá ƀă Ôm hyô kong pơlê tơrŭ ƀă Khu ngăn hdroâng kuăn ngo kong pơlê Dak Lak tơkŭm po Rôh t’noăng ivá mâu hdroâng kuăn ngo kong pơlê Dak Lak hơnăm 2022. Rôh tơ’noăng hiăng po hơniâp ro ƀă 7 môn tơ’noăng a ‘na kơnốu ƀă kơdrâi mê cho: peăng ƀâ long, kơtu ƀâ long ki iâ mơngế, kơtâu, to chĕng klĕng, pĕng mơnĕng, trut loăng ƀă hrot kơxái; tơ’mot lối 600 ngế veăng tơ’noăng.

Diâp pri ăm mâu khu ki tơ’noăng châ ƀlêi má môi.

Kố cho rôh tơ’noăng ivá khôi hmâ châ tơkŭm po tiah hmâ, vâ mơnhông rơdâ tơdroăng hriâm tâp ƀă tơ’noăng, mơdêk ivá. Ing mê rah xo mâu ngế ki tơ’noăng rơkê, châ hên tơdroăng ki ƀlêi chiâng tung lâp tơnêi têa kô châ tơkŭm po a kong pơlê Lai Châu tung hơnăm kố. Mơgêi rôh tơ’noăng, Khu tơkŭm po hiăng diâp 149 pri ối má môi, ối má péa, ối má pái a mâu tơdroăng ki tơ’noăng ăm mâu ngế krê, tíu châ kâ pri. Tơring Krông Ƀuk châ kâ pri ối má môi tung tâi tâng khu.

Katarina Nga tơplôu ƀă tơbleăng