Rơhé chôu - xuân môi tiah tơdroăng ki hiăng khĕn, krếo rơhé mê, xua ga chôu, xú kơhiâm ki tơviah dêi pló drôu xiâm. Ga phá tơ-ê tâ ƀă mâu kế kâ ki ê, môi tiah tơxông prông, í pôh ƀă hên mâu tơmeăm ki ê hmâ xúa tung pơla leh mơdĭng dêi thôn pơlê, rơhé chôu cho kế kâ ki hiăng hmâ rêm hâi dêi rêm rơpŏng hngêi K’Ho. Vâi prế rơhé chôu vâ kâ rêm hâi, vâ djâ tơvế a chiâk deăng teăng têa ôu.

Tiô jâ K’Bri ối kơphô̆ Kon Tách Đăng, pơlê kân Đinh Văn, tơring Lâm Hà, kong pơlê Lâm Đồng tối, tơmeăm ki vâ pế rơhé chôu mê ga tơ’lêi tê, mê cho phái. Jâ K’Bri tối tiah kố:

“Pế rơhé chôu mê pế ƀă phái ki lâi xuân hôm, xuân chiâng pế ƀă phái chiâk, phái tê a kơchơ lơ alâi. Pế ƀă phái ki tê a kơchơ mê athế tăng rah phái ki pế têi, khăng. La ki kơhiâm má môi xuân cho phái chiâk”.

Vâ pế rơhé chôu mê, vâi athế pế phái ki mê lếo têa hên, pế ăm i liê chiâng rơhé. Ki apoăng cho rơchâ phái, mâ tá rơchâ luâ ton, tâng rơchâ lối ton, krúa lối râ rơhế chên kô ôh tá kơhiâm. Klêi mê, nếo drăng a kơnoh on vâ pế. Vâ khoh chiâng rơhé ki chôu mê hdro rơhé athế pế ăm ga chên krâ kơ vâ, ôh tá chiâng pế lối poh, xua pế lối ton ah rơhé kô liê luâ râ, ôh tá kơhiâm.

Klêi kơ’nâi pế rơhế mê, ôh tá êa râm mâu po, ƀôt ngot, bu kal tơkôm ga hiăng ngê, klê mê nếo o tâ tung plôi têa, kơchâ i xí drăng ko plôi. Kơtúa plôi a drá peăng on dâng 1 troh 2 hâi ga hiăng chiâng rơhé chôu.

Jâ K’Bri tối ‘na túa vâ pro chiâng rơhé chôu tiah kố:

“Á pế rơhé tơkôm ga vâ chên iâ, mê á xêi hdro vâ kâ ga kơhiâm. Ôh tá khoh lôi rơhé mê chên ó lối râ. Ngin hmâ kơtúa plôi a drá peăng ai 1 troh 2 hâi, mê rơhé tung plôi kô chôu. Vâ khoh ai rơhé chôu mê klêi kơ’nâi pế rơhé a kơnoh on, mê tơkôm ga ngê ‘nôi, nếo o tâ tung plôi khăng ki dâ têa, klêi mê, kơtúa a drá peăng”.

Tối ‘na kế ki vâ kâ ƀă rơhé mê ăm ga i tơtro, jâ K’Bri tối ăm nâi, rơhé chôu mê xuân chiâng vâ kâi tâi tâng ƀă mâu kơchâi ki ê. Ngăn tiô kơ roh ki pế, ƀă ngăn tiô kơ tơdroăng ki rơhêng vâ dêi ngế ki kâ, vâi kô kâ dêi tơmeăm ki tơná rơhú vâ kâ. Jâ tối ăm ‘nâi:

“Pin xuân chiâng vâ kâ adrêng ƀă mâu kơchâi, hơ’nêh mâm, la ki kơhiâm má môi mê cho kâ ƀă ká khăng, ká âp ki pêi tơvât ƀă hăng drêh”.

Mơngế K’Ho hmâ loi dêi tiah kố, rơhé chôu cho kế kâ ki kơhiâm, ki ai trếo lĕm, ôh tá păng lôi. Rơhé kố ga ai pơxúa hên, ga cho vâ teăng pro têa ôu rêm hâi drêng pêi chiâk pêi deăng trâm hên tơdroăng tơbrêi lêa, rơlâi rơlo. Pakĭng mê, rơhé chôu ối chiâng vâ hbrâ mơdât tơdroăng ki tro pôu ‘mêi xua kong tô, kum ăm ivá châ chăn kâi trâng ƀă hyôh kong pro ‘mêi. Rơhé chôu ối cho kế kâ ki hiăng hmâ dêi mơngế K’ho. Mê cho tơmeăm kâ ki mơhno túa lĕm tro ki châ hnê djâ dêi sap ing chal vâi krâ roh nah troh nôkố. Vâi krâ-nhŏng o, tơmối tâng pôu ngăn, troh ôm hyô a kong pơlê Lâm Đồng mơni kô châ mơnúa tế kâ ngăn rơhé chôu, vâ ing mê, kô ‘nâi tơ’nôm mâu túa kơchâi, hmê ki krê xêh dêi hdroâng mơngế K’Ho a tíu kố.