Nâ Ka Ƀông, cho kơvâ K’Ho Sre ối a thôn Phú Bình, cheăm Phú Hội, tơring Đức Trọng, kong pơlê Lâm Đồng ai 2 ngế kuăn. Nâ tô tuăn ‘nâng xâu la ngiâ ah kuăn dêi tơná kô piu hiât lôi rơkong tơpui, chư chêh dêi kuăn ngo tơná, nâ pói  rơhêng vâ peá ngế kuăn chiâng pơchuât, chiâng tơpui nâl kuăn ngo K’Ho dêi tơná.

Nâ Ka Ƀông ai tối tiah kố:

“Nôkố, facebook, zalo châ hên ngế rơhêng vâ xúa, mê rơkong tơpui, chư chêh dêi hdroâng K’Ho pin ôh tá ai hên ngế rơhêng vâ tí tăng hriâm xếo. Á pói rơhêng vâ peá ngê kuăn á ‘nâi kơdo mơ-eăm rak vế nâl tơpui, chư chêh dêi kuăn ngo tơná, mê cho athế ’nâi pơchuât, ‘nâi tơpui, ‘nâi chêh nâl hdroâng kuăn ngo tơná”.

O Lơ Mu Nay Sa, kơvâ K’Ho Cil, kot mâ hơnăm 2002, ối a thôn Srê Đăng, cheăm N’THôl Hạ, tơring Đức Trọng, kong pơlê Lâm Đồng dế nôkố cho sinh viên hơnăm má 3, Kơvâ Hnê hriâm râ má môi, hriâm a Hngêi trung Đăi hok Tây Nguyên, tối ăm ‘nâi, á pơlê á nôkố ôh tá ai tơdroăng ki tôu hơkâ, tŏn chêng ƀă rơngê ting ting xếo a mâu hâi mơdĭng.

Thăm nếo, mâu ngế tung rơpŏng hngêi tơpui dêi pó tung rơpŏng hngêi ƀă nâl Xuăn. Preăng hlo tơdroăng ki xâp rơnuâ ếo pơtâk dêi hdroâng kuăn ngo tơná. Drêng á ối tơxĭn nah xuân hmâ tâng dêi jâ, cho nôu peăngu pá nôu á tôu hơkâ, tŏn chêng. Drêng hiăng xông kân, jâ á o hiăng hlâ, pá ai xếo tơdroăng ki rơkê mâu tơdroăng tiô chal vâi krâ roh nah ƀă um méa ki mê bu u ối tung hiâm mơno á tê.

O Lơ Mu Nay Sa, ai khéa iâ tối tiah kố:

“Á pói rơhêng vâ a mâu roh leh, mâu vâi krâ, mâu kăn pơlê, mâu ngế hriăn plĕng ‘na khôi túa, vêa vong dêi hdroâng kuăn ngo tơná pơtối hnê tối ăm ngin chal nếo, vâ ngin châ hriâm, châ hlê ƀă pơtối rak vế dêi khôi túa, lĕm tro dêi hdroâng kuăn ngo tơná. Vâ la ngiâ ah, ngin pơtối ‘nâi rak vế, pơtối mơnhông tơdroăng ki lĕm tro dêi hdroâng kuăn ngo tơná. Xuân vâ la ngiâ ah, ngin pơtối rak vế dêi khôi tuá, lĕm tro hdroâng kuăn ngo tơná, vâ ga pôi tá hía lôi ôh”.

Vâ pơtối rak vế tơdroăng ki tơrŭm pơla mâu hdroâng kuăn ngo, kong pơlê Lâm Đồng hiăng thăm mơdêk tơdroăng ki kơnía git ‘na túa lĕm tro mâu hdroâng kuăn ngo, thăm mơdêk tơdroăng ki hâk tơngăm ‘na tơdroăng ki kơnía khôi túa lĕm tro; mơhnhôk thế vâi krâ-nhŏng o pơtối rak vế tơdroăng rơngê rơngối, ting ting, kơhnhon xuăng, tŏn chêng tôu koăng dêi kuăn ngo.

Kong pơlê xuân hiăng mơ’no liăn kum rôe mâu ếo pơtâk vâ pơtối rak vế hên tơdroăng mơdĭng dêi kuăn ngo, môi tiah Tĭng lôi tơnâp kiâ dêi mơngế K’Ho a K’Long, tơring Đứs Trọng, Tĭng kâ báu nếo dêi mơngế K’Ho Sre a tơring Di Linh, Tĭng djiân báu tung hnôu dêi mơngế K’Ho Sre a tơring Lâm Hà, Tĭng pơkŏng ŏng mế dêi mơngế K’Ho Cil a cheăm Dà Chais, tơring Lạc Dương ƀă hên hĕng mâu mơdĭng ki ê hiá.

O Ka Tảo, hdroâng kuăn ngo K’Ho Sre, kot mâ hơnăm 1998, dế nôkố cho sinh viên hơnăm má mơ’nui dêi Kơvâ Séa ngăn mơheăm, Hngêi trung Đăi hok Tây Nguyên tối ăm ‘nâi: A pơlê á o, thôn Kon Pàng, cheăm Tân Thanh, tơring Lâm Hà, kong pơlê Lâm Đồng tối, kuăn pơlê xuân ối rak vế dêi khôi túa, vêa vong dêi hdroâng kuăn ngo tơná. Mâu tơmeăm khoăng môi tiah chêng koăng, ƀă  mâu tơdroăng leh mơdĭng tiô khôi hmâ vâi krâ roh nah xuân ối châ rak vế ƀă pơtối mơnhông mơdêk, xua ti mê râ, á môi tiah châ tâng, châ ‘nâi, châ hlê plĕng ‘na khôi túa, vêa vong mê klêi kơ’nâi á hiăng xông kân.

O Ka Tảo, hơniâp ro tối:

“Á pơlê á, vâi krâ-nhŏng o xuân ối rak vế tơdroăng tŏn chêng, tôu koăng, rơngê ting ting, mâu vâi droh rơtăm tung pơlê xuân ai hên ngế rơhêng vâ hriâm ƀối. A mâu roh pơkŏng ŏng mế, rơkâu hâk vâi krâ tơkoh hơnăm, a mê ai mâu vâi rơtăm châ hmâng, châ ‘nâi tơdroăng tŏn chêng koăng, á hlo ro rih ó khât ƀă ai pơxúa, mê cho khôi túa, vêa vong dêi pơlê pơla, cheăm bêng vâi krâ - nhŏng o hdroâng kuăn ngo pin”.

O Ka Tảo, mơngế sinh viên đăi hok rơhêng vâ khôi túa, vêa vong dêi hdroâng kuăn ngo tơná châ mơhno tối, tơbleăng mơ’no a hlá tơbeăng, rơ’jíu, um tơvi vâ rơxông nếo nôkố hlê plĕng nhên.

O Ka Tảo ai tối tiah kố:

“Á poí rơhêng vâ mâu vâi pú nôkố chiâng rơngê ting ting, xo nâl pơto pơtih ki nếo, rơkê kơhnhon xuăng, mâu leh mơdĭng, tơdroăng pro tĭng dêi hdroâng kuăn ngo tơná xuân athế châ mơ’no hên a rơ’jiú, um tơvi vâ hên ngế châ ‘nâi, châ plĕng, pơtối hriâm ƀối, rak vế, mơdêk rak vế dêi khôi tuá, vêa vong dêi hdroâng kuăn ngo tơná”.

Tơdroăng ki pơtối rak vế rơkong tơpui, chư chêh dêi mâu hdroâng kuăn ngo xuân hiăng châ mâu khu râ, kơvâ cheăng a kong pơlê Lâm Đồng tŏng kum, ngăn khât. Mâu tíu ki kố xuân hiăng mơ’no tối tung tơdroăng hnê hriâm ‘na rơkong tơpui, chư chêh dêi hdroâng kuăn ngo ăm hok tro hdroâng kuăn ngo K’Ho tối krê, tâi tâng mâu hdroâng kuăn ngo ki ê tối tơdjuôm a mâu pơlê cheăm ki ai kơdrâm hdroâng kuăn ngo rêh ối ƀă hnê rơkong tơpui, chư chêh dêi hdroâng kuăn ngo ki iâ mơngế a mâu hngêi trung phôh thong kuăn ngo ai tíu kâ koi ôí pơtê.

Hâi kố, xuân chiâng hlo nhên a mâu pơlê cheăm hdroâng K’Ho tối tơdjuôm, pơlê cheăm dêi Tây Nguyên tối krê, hiăng hlo ai hên vâi rơxông nếo ki châ hriâm troh lâm kân pói rơhêng vâ châ pơtối rak vế, hlê plĕng khôi túa, vêa vong dêi hdroâng kuăn ngo tơná.

Ki kơnía a kố, mâu vâi pú hơnăm ối nếo hlê plĕng tro vêa vong dêi kuăn ngo tơná. Vâ rơtế prôk ƀă mâu vâi pú hơnăm ối nếo hdroâng K’Ho tối krê, mâu hdroâng kuăn ngo a kong pơlê Lâm Đồng tối tơdjuôm, rêm khu râ, kơvâ cheăng kal athế po lâm hnê rơngê, ting ting, tŏn chêng, tôu koăng, po lâm hnê chêh chư, nâl tơpui dêi hdroâng kuăn ngo ăm mâu vâi o, vâi muăn ki ối a mâu pơlê pơla, a mâu hngêi trung. Ing mê, veăng kum rak vế, pơtối mơdêk, mơnhông ki kơnía git ‘na khôi túa, vêa vong vâi krâ roh nah ki lĕm tro.