Sap ing hơnăm 2022, Khu xiâm ngăn Mơhno túa lĕm tro hiăng tơkŭm po Leh tơbleăng hbrâ rơnáu inâi hnoăng cheăng hơnăm 2022 dêi Kơvâ Mơhno túa lĕm tro, Tơ’noăng ivá ƀă Ôm hyô: “Mơjiâng tơdroăng ki hlê plĕng a kong pơlê ƀă hnoăng cheăng trrŭm kăn ƀô̆”. Khu xiâm ngăn Mơhno túa lĕm tro, Tơ’noăng ivá ƀă Ôm hyô xuân hiăng pơkâ tơdroăng pêi pro Mơgêi dêi pôa Nguyễn Phú Trọng, kăn xiâm pơkuâ hnê ngăn Đảng a Rôh hôp Hlê plĕng lâp tơnêi têa ƀă tơdroăng cheăng tung la ngiâ mơnhông mơdêk mơhno túa lĕm tro troh hơnăm 2030.

Khu pơtâng tối tơdroăng kal tơnêi têa pơkuâ po rôh hôp tơnêi têa “Ki kơnía tơnêi têa, ki kơnía ‘na mơhno túa lĕm tro, ki kơnía rơpŏng hngêi ƀă ki tro ‘ló dêi kuăn mơngế Việt Nam tung chal nếo”. Hên kong pơlê, pơlê kong kân tung lâp tơnêi têa hiăng pơkâ mâu tơdroăng tơbleăng mơgêi dêi pôa Nguyễn Phú Trọng, Kăn xiâm pơkuâ hnê ngăn Đảng a Rôh hôp hlê plĕng lâp tơnêi têa.

Hà Tĩnh cho kong pơlê ki apoăng tơkŭm po Rôh hôp Hlê plĕng túa pơkâ hôp lâp kong pơlê tơbleăng mơgêi Rôh hôp mơhno túa lĕm tro lâp tơnêi têa 2021.

*** A Hneăng hôp tơpui tơno Khôi túa lĕm tro 2022 ƀă dó inâi ‘’Pơkâ pêi, troăng hơlâ ƀă mơngế pêi cheăng ăm mơnhông mơdêk khôi túa lĕm tro’’. Xông tơpui a tơdroăng kal kố, pôa Y Thanh Hà Niê Kdăm, Kăn hnê ngăn Hô̆i đong hdroâng kuăn ngo tối ăm ‘nâi, Việt Nam cho môi tơnêi têa hên hdroâng mơngế, rêm hdroâng mơngế ai mâu khôi túa lĕm, tơdroăng rêh ối ƀă mâu khôi túa lĕm tro ki phá krê, djâ ki phá tơ-ê.

Cho ing tơdroăng mê hiăng pro ăm Việt Nam môi khôi túa lĕm tro rế hên, hlối chiâng môi. Xua mê, rak vế ƀă mơnhông mơdêk ki kơnâ khôi túa lĕm tro pơlê pơla mâu hdroâng kuăn ngo vâ rak tơniăn ki hên, ki chiâng môi, ki tơtro ƀă krá tơniăn tung mơnhông cheăng kâ – rêh ối pơlê pơla dêi tơnêi têa đi đo châ Đảng, Tơnêi têa rak ngăn, pêi pro.

Pơkâ rak ƀă mơdêk ki kơnâ khôi túa lĕm tro mâu hdroâng kuăn ngo Tây Nguyên rế hía rế thâ tung tơdroăng trâm mâ tơpui tơno ƀă mot tơrŭm lâp plâi tơnêi. Rơtế ƀă tơdroăng tơmâng rak vế ƀă mơnhông mơdêk ki kơnâ khôi túa lĕm tro tung tơdroăng mot tơrŭm mê, tơdroăng mơjiâng pro mơnhông mơdêk ƀă rŭm krá tơniăn tơdroăng rak vế ƀă mơdêk ki kơnâ khôi túa lĕm tro mâu hdroâng kuăn ngo ƀă mâu tơdroăng tơkêa bro, troăng hơlâ mơnhông mơdêk cheăng kâ – rêh ối pơlê pơla kơpong hdroâng kuăn ngo, kong ngo xuân kal châ pơkâ mơ’no.