VOV4.Xơ Đăng - Hneăng tơ’noăng hơdruê xuâng lâp tơnêi têa hneăng 2, hơnăm 2021 nếo po a kong pơlê Dak Lak. Mâu hâi hdrối mê hía nah, mâu khu ki hơdruê xuâng lo ing mâu kong pơlê, pơlê kong kân tung lâp tơnêi têa hiăng pleăng dêi hnoăng cheăng tơná ăm mâu ngế ki tơmâng, ki ngăn. Rêm ngế ngê̆  sih, mâu ngế ki mơđah ƀă mâu khu pơrá kơdo mơ-eăm tâi dêi ivá tơná vâ mơđah klêi đeăng ‘na tơdroăng mê.

Hriăn tơmiât xo ing tơdroăng ki mơnhông ’na tơnêi tíu, ƀă kuăn mơngế, khu hơdruê xuâng kong pơlê Bình Dương veăng tơ’noăng hơdruê xuâng lâp tơnêi têa hneăng má 2, hơnăm 2021 ƀă tơdroăng ngê̆ thuât dó inâi ‘’Bình Dương-Tơnêi tíu phiu ro-Tơdroăng hơ-ui pâ pơla kuăn mơngế’. Tung plâ 2 tơdroăng ‘’Kơpong tơnêi tíu phâi tơtô’’, ƀă ‘’Hơ-ui pâ kuăn mơngế’’, mê kuăn pơlê mơni kô châ hlo mơnhên sap ing tơdroăng ki mơnhông dêi kơpong tơnêi tíu ki kố, ing hiâm tuăn ‘na môi roh ki pơxiâm tăng tơnêi, mơjiâng pơlê ƀă mâu tơdroăng cheăng pêi tiô khôi hmâ.

Tá troh a pơla hiăng xông tơtêk tung pêi cheăng kơmăi kơmok chal nếo, tơdroăng ki hiăng rơkê chiâng tơdroăng nếo, drêng Bình Dương hiăng chiâng pơlê kong kân ki cheăng ‘na kơmăi kơmok, cho tíu ki tơkŭm hên kuăn pơlê ing lâp lu tơnêi têa troh pôu pêi cheăng kâ, rêh ối.

 Pôa Trần Thanh Sơn, Kăn pơkuâ khu hơdruê xuâng ngê̆ thuât kong pơlê Bình Dương, pơkuâ ngăn ‘na ngê̆ thuât, chêh bro ƀă hnê pơkuâ ‘na tơdroăng hơdruê xuâng tối ăm ‘nâi, ƀă mâu tơdroăng hơdruê xuâng, rêi prôa tơchoâm, hơdruê hên ngế, mê tơdroăng ki mơđah kố tơkŭm lối 70 ngế ngê̆ sih, mơngế ki hơdruê xuâng, diễn viên, ca sĩ, kan ƀô̆ ki mơđah hơdruê xuâng ƀă pơchên hmê kơchâi kâ.

‘’Kố cho môi hneăng ki tơ’noăng hơdruê xuâng ki păng ‘nâng, xua mê, xuân kal athế ai tơdroăng mơ’no liăn, kế tơmeăm ƀă mâu tơdroăng ki hriâm tâp tơbrê tơbrêh, tơdroăng pơtâp kố bê ton châ 2 khế. Ki rơkê plĕng dêi ngê̆ thuât kố mê ngin pơrá xúa ‘na nâl tơpui, um méa dêi kong pơlê Bình Dương, thăm nếo, tá mâu prôa, rơvŏng hlŭm xuân cho dêi Bình Dương, pơtih, mâu vó, kơ’lo, kung kếo, tơ’lo ƀă mâu phêa, pơ-óu lơ mâu loăng ngin mơjiâng pro chiâng tơmeăm khoăng dêi kuăn ngo, vâ mơhno mơnhên kố cho túa ki lĕm tro dêi Bình Dương, ai ki klâi xúa kế ki mê’’.

Rêm khu hơdruê xuâng hiăng mơđah mâu khôi túa ki phá krê, mơhno tối dêi khôi túa kơpong tơná

Tơ’noăng hơdruê xuâng lâp tơnêi têa hneăng má 2 hơnăm 2021 ai 22 khu ngê̆ thuât, lối 1 rơpâu ngế ngê̆ sih, diễn viên, kăn ƀô̆ ki cheăng ‘na kơvâ ngê̆ thuât tung lâp tơnêi têa veăng. Maluâ pơreăng COVID-19 ai tơdjâk kân kĕng troh tơdroăng cheăng ngê̆ thuât mơđah la mâu khu kố hiăng ai hên tơdroăng kơdo mơ-eăm, hlê hriăn plĕng mơnhên tung tơdroăng mơjiâng ‘na hơdruê xuâng, ai hên túa, hên râ pơrá phá dêi pó. Tơkâ luâ mâu tơdroăng ki xahpá, kơdroh xua ai tơdjâk troh dêi pơreăng ƀă hâi khế, chôu phut ki mơhriâm thâ rĕng, mâu ngê̆ sih hiăng kơdo mơ-eăm tâi ivá tơná vâ ai mâu tơdroăng ki hơdruê xuâng ki lĕm tro, ro rih má môi.

Ca sĩ A Tâm, ối tung khu ngê̆ thuât kong pơlê Kon Tum tối:

‘’Veăng lăm mơđah roh kố ga ai hên tơdroăng ki phá tơ-ê. Xua klêi kơ’nâi pơreăng, tâi tâng rêm mâu tơdroăng cheăng ngê̆ thuât tối krê ƀă mâu tơdroăng cheăng ki ê tối tơchoâm ki hiăng pơtroh ăm 2 hneăng tơ’noăng kố, mâu ngê̆ sih pơrá hiăng tơkôm vâ tơmâng, vâ ngăn. Mê cho tơdroăng ki kơdo mơ-eăm dêi tâi tâng khu, dêi mâu kăn pơkuâ, kơ koan, ƀă mâu tơdroăng ki kơdo mơ-eăm dêi mâu thái cô ki hiăng hnê hriâm tiô kơ tơdroăng ki dâi khât, mơ-eăm pơtâp tung hâi khế ki ôh tá ton to lâi ôh, la rêm ngế hiăng vâ môi tuăn’’.

Ti xê to ƀă mâu khu ki veăng mơđah hơdruê xuâng, kơvâ ngăn ‘na mơhno túa lĕm tro dêi kong pơlê Dak Lak xuân hiăng kơdo mơ-eăm pêi pro klêi dêi hnoăng cheăng tơná. Tiô pôa Đặng Gia Duẩn, Kăn phŏ hnê ngăn khu mơhno túa lĕm tro, ivá ƀă ôm hyô kong pơlê Dak Lak ăm ‘nâi, maluâ tung pơla trâm hên tơdroăng xahpa, kế tơmeăm tá hâi teăm bê tŭm tiô kơ tơdroăng ki hên kong pơlê kal vâ, laga, kong pơlê xuân hiăng kơdo mơ-eăm pêi pro, hbrâ rơnáu tŭm mâu tơmeăm khoăng ƀă tíu ki lĕm má môi ăm dâng rơpâu ngế ngê̆ sih veăng mơđah, mơhno tối tơdroăng ki pâ thế dêi mâu khu pơkuâ ngăn ‘na hơdruê xuâng kong pơlê vâ khoh ăm tơdroăng ki mơđah mê tơniăn lĕm má môi.

Pôa Đặng Gia Duẩn ai tối:

‘’Tơdroăng ki hbrâ ăm hneăng tơ’noăng kố cho hiăng rơnáu hdrối, tâi tâng mâu tơdroăng ki mơđah mê ing kế tơmeăm, kơmăi kơmok, on, tíu ki ối, hmê kơchâi kâ ƀă mâu tơdroăng ki ê, mê kong pơlê Dak Lak hiăng hbrâ ai tŭm tơmeăm ki vâ xúa, vâ dâi dêi tơrêm khu ngăn ‘na hơdruê xuâng. Tiô tơdroăng séa mơnhên ngăn dêi mâu khu pơkuâ ngăn ‘na hơdruê xuâng, troh a chôu phut kố, kong pơlê Dak Lak hiăng pêi pro tŭm dêi hnoăng cheăng tơná hiăng pro xiâm, po tơdjâ tơdroăng tơ’noăng kố’’.

Mâu tơdroăng hơdruê xuâng hiăng châ mơ’no tŏng kum hên tơdroăng, kế tơmeăm

Po sap ing hâi lơ 17 troh lơ 30/6, hneăng tơ’noăng hơdruê xuâng lâp tơnêi têa má 2, hơnăm 2021 ai vâ chê 200 tơdroăng hơdruê xuâng, ai tŭm mâu tơdroăng môi tiah hơdruê, xuâng, rêi môi prôa, rêi hên prôa, cải lương, ca kịch, chèo, tuồng. Rêm tơdroăng mê ton sap ing 65 troh a 100 phut hiăng pơtroh ăm mơngế ki tơmâng mâu tơdroăng hơ’muăn tối ‘na tơdroăng ngê̆ thuât ki hơniâp ro.

Mê cho ki tơ-ƀrê dêi hnoăng pêi cheăng ƀă ki kơdo mơ-eăm dêi tơrêm ngế ngê̆ sih, diễn viên, rêm khu ngăn ‘na hơdruê xuâng vâ veăng kum ăm tơdroăng ki ƀlêi chiâng ƀă mơhno tối ‘na mâu tơdroăng ki hơdruê xuâng, mơhno tối mâu ngê̆ thuât troh achê ƀă kuăn pơlê hên tâ.

H’Xíu H’Mok chêh

Nhat Lisa tơplôu ƀă tơbleăng