VOV4.Xơ Đăng - Pêi pro tơdroăng leh tơbâ 92 hơnăm Hâi mơjiâng Đảng (3/2/190 – 3/2/2022), kơmăng hâi lơ 26/1, a Hngêi hơdruê kân, Hlá tơbeăng Điê̆n tưh Đảng Kŏng san Việt Nam, ối tung Khu xiâm pơtâng tối tơdroăng hnê mơhno cheăng kal kí tơkŭm po Tơdroăng ngê̆ thuât ki má môi ‘’Rak tơdroăng loi tơngah’’. Tơdroăng kố châ pro rơkê, tơdjêp pro 2 tơdroăng: “Rak tơdroăng loi tơngah” ƀă “Tơnêi têa tơpo reăng’’, ƀă lối 10 tơdroăng ki má môi ối tung mâu tơdroăng hơdruê, xuâng châ pro rơkê tiô troăng hơdruê, nâl hơdruê ngê̆ thuât tiô rơxông nếo.

Tơdroăng cho roh vâ tơbâ tơdroăng mơnhông mơdêk ƀlêi trâng dêi Đảng, mâu tơdroăng ki eăng bâ, mâu tơdroăng châ tơƀrê kâ kơnâ dêi kăch măng Việt Nam ing pơkuâ dêi Đảng; mơnhên troăng prôk 92 hơnăm tơplâ, mơjiâng ƀă mơnhông mơdêk; tơbâ mâu tơdroăng hriâm rơkê tơkâ hluâ pá puât, tơdroăng pleăng dêi châ chăn mơheăm chhá vâ chê ƀlêi trâng rơtế mâu tơdroăng ƀlêi trâng kân dêi kuăn pơlê hiăng châ tơƀrê ing pơkuâ dêi Đảng ƀă Pôa Hồ Chí Minh, Kăn xiâm hnê ngăn tơnêi têa hneăng apoăng.

Ing mê, thăm hlê plĕng ƀă phiu ro ‘na hdroâng mơngế Việt Nam, ‘na Đảng Kŏng san Việt Nam ƀlêi trâng tơplâ xua tơniăn lĕm dêi Tơnêi têa, xua hơniâp lĕm ro dêi kuăn pơlê.

A Sa Ly tơplôu ƀă tơbleăng