VOV4.Xơ Đăng – Troh ƀă kế kâ dei mơngế Rơđế pakĭng kế kâ ki kơhiâm sap ing mâu kơchâi kong mê ối ai mâu kế kâ ki kơhiâm lĕm tơviah sap ing reăng kong, môi tiah reăng plâi rơhung, reăng plâi tơrâ, reăng priât ƀă hên ki ê. Mơngế Rơđế xúa mâu kế kâ sap ing reăng kong ƀă pế pơchên chiâng mâu kế kâ kơhiâm, hlối cho pơkeăng pơlât mâu tơdroăng châi tơƀrê lĕm. Tung mê ôh tá chiâng lôi mâu kế kâ ki kơhiâm sap ing reăng klô̆ng klông.

A dâng khế 4, khế 5 cho rơnó reăng klô̆ng trĭng kong tơ’noăng dêi pó tơpo reăng. Mơngế rơđế djâ dêi pó pôu pong lăm krê reăng klô̆ng trĭng kong. Sap ing ton nah mơngế Rơđế hiăng ‘nâi pế kâ  ing reăng klô̆ng trĭng kong. Xua mê um reăng klô̆ng trĭng kong (Rơđế tối dêi djam muôi) xuân châ tối troh mâu rơkong tơpui ƀă tơdroăng hơdruê Rơđế. Tơmeăm ki kố bu tơpo reăng klêi kơ’nâi kong mêi apoăng rơnó.

Reăng klô̆ng trĭng kong

Ôh tá xê to djâ ki lĕm dêi ngo kong kế Tây Nguyên mê roh kâ hmê ki lâi ai kơchâi kâ ing reăng klô̆ng trĭng kong mơni kô kâ tâi hmê kơchâi. Nâ H’Lai Hđơ̆k, ối a Ƀuôn Čuôr Knia, cheăm Ea Bar, tơring Ƀuôn Đôn, kong pơlê Dak Lak tối ăm ‘nâi, reăng klô̆ng trĭng chiâng pế hên kơchâi kâ ki kơhiêm. Klêi kơ’nâi krê lêa tah hlá reăng pakong, lôi reăng ki ối kơbâng ai hên têa. Kố cho tíu ki kơhiêm má môi dêi reăng klô̆ng trĭng kong vâ pế pơchên hên kơchâi kâ ki kơhiêm.

Êđê‘’Tơdroăng pế kơchâi má môi mê pin xếo krúa, âp ƀă têa tôu, kêi tâ tung kơtháu vâ xĭng têa ƀă pêi ƀă pôm prel. Tơdroăng pế má péa, mê pin xuân âp, kêi ‘măn tung kơtháo vâ xĭng têa, klêi mê xao ƀă ká âp, lơ ká cơm, tơ’nôm po hăng cho kơhiêm’’.

Pakĭng mê, lĭng dêi reăng kô chiâng âp, âp chên lơ xao klêa í kô rak ki xú hŏm phá tơ-ê dêi ki xú hŏm reăng, ki rơpâ ƀơi ƀơi dêi reăng klô̆ng trĭng kong. Châ reăng klô̆ng trĭng kô chiâng pêi drêh lơ pôh kâ ƀă ká khăng, po, hăng ƀă ƀô̆t ngŏt, pêi hrê chiâng kơchâi kâ khăng.

Reăng klô̆ng trĭng kong âp, pêi ƀă pôm prel, toih ku kŭn hdroâng kuăn ngo, po hăng

Ngoh Y Đăp Êya, ối a Ƀuôn Nui, cheăm Tâm Thắng, tơring Čư Jut, kong pơlê Dak Nông tối, hdrối nah, rêm roh lăm chiâk deăng, kuăn pơlê tung pơlê kê châ pêng pong djâ vêh pro kơchâi kâ. Laga nôkố hên tơmối tăng rôe reăng klô̆ng trĭng kong vâ pế pơchên kâ a rơnó reăng hŭn tơpo, kuăn pơlê krê tê ăm mâu tơmối vâ pêi lo tơ’nôm liăn ngân. Xua mê, reăng ki phá tơ-ê kố nôkố xuân hiăng iâ.

Êđê’’Reăng klô̆ng trĭng kong hŭn tiô kơpong. Tiô tơdroăng hâk vâ dêi rêm ngế kô pế pơchên phá tơ-ê dêi pó. Á hâk vâ âp ƀă pêi ƀă pôm prel, toih ku kŭn hdroâng kuăn ngo, po hăng. Nôkố reăng klô̆ng trĭng kong xuân hiăng ôh tá ai hên xếo, lăm a mâu kơpong hơhngế tâ nếo châ krê hên’’.

Rơnó reăng klô̆ng trĭng kong bu ai môi xôh tung hơnăm, cho mơjo tâng ai kơbố troh a pơlê Rơđế a roh kố ôh tá châ kâ kơchâi kâ ing reăng klô̆ng trĭng kong. Reăng klô̆ng trĭng kong hŭn chiâng xêh tung kong, krúa lĕm, chiâng môi um méa ki lĕm ăm kơpong tơbăng kân rơdâ bazan mê ối pro chiâng mâu kơchâi kâ pêng păm ki xú hŏm ng ngối kong kế./.

Zawut chêh

A Sa Ly tơplôu ƀă tơbleăng

-